ថ្ងៃអង្គារ ទី១៧ ខែឧសភា ឆ្នាំ២០១១ ម៉ោង ១៧:៥១
ថ្ងៃអង្គារ ទី១៧ ខែឧសភា ឆ្នាំ២០១១ ម៉ោង ១៧:៥១
ក្រុងប៉ោយប៉ែត ៖ រឿងក្តីមួយស្ទើរតែមិនគួរឱ្យជឿ ខណៈដែលភាគីម្ខាងជាស្ត្រីភេទ និងម្ខាងជាសង្ឃ ព្រោះតែពាក់ព័ន្ធរឿងលុយ ។ ភាគីដើមបណ្តឹងគឺជាសង្ឃបានប្តឹងភាគីស្ត្រីទារលុយវិញជាង ១ពាន់ដុល្លារដោយសំអាងថា ជាលុយជំពាក់ តែភាគីស្ត្រីអះអាងថា ជាលុយដែលឱ្យមិនមែនជាលុយខ្ចីទេ ។
ភាគីសង្ឃនាមសាំង អៀង ព្រះជន្ម៣៩ឆ្នាំ គង់នៅវត្តប្រជាធម្មត្រ័យ ស្ថិតក្នុងភូមិប្រជាធម្មសង្កាត់ប៉ោយប៉ែត ឯភាគីស្ត្រីឈ្មោះហ៊ាង ស្រីពៅ អាយុ៣៣ឆ្នាំ ជាអាជីវករលក់ខោអាវ នៅផ្សារលុងក្លឿទឹកដីសៀមមានទីលំនៅក្នុងភូមិប្រជាធម្ម សង្កាត់ប៉ោយប៉ែត ។
ភាគីសង្ឃជាដើមបណ្តឹងឱ្យដឹងថា នាងស្រីពៅបានខ្ចីលុយព្រះអង្គជាង១ពាន់ដុល្លារ ដោយថា យកទៅរកស៊ី ប៉ុន្តែពេលព្រះអង្គត្រូវការលុយវិញ បែរជាបដិសេធថា មិនបានខ្ចីទៅវិញទាំងឪពុកទាំងកូន ។ ម្យ៉ាងស្ត្រីនោះដេញឱ្យទៅប្តឹងទើបព្រះអង្គប្តឹងទៅប៉ុសិ៍្ត ប៉ូលិសរដ្ឋបាលសង្កាត់ប៉ោយប៉ែត ដើម្បីទារលុយវិញជាង១ពាន់ដុល្លារ កាលពីចុងខែមេសា ២០១១ ។ ការប្តឹងនោះព្រះអង្គបានដកពាក្យបណ្តឹងវិញហើយកាលពីថ្ងៃទី១ ឧសភា ដោយគិតថា បើភាគីស្ត្រីនោះមិនសងក៏ហីទៅចុះ ចាត់ទុកជាកម្មពៀរសងគ្នាពីអតីតជាតិ ។
ចំណែកស្រ្តីឈ្មោះហ៊ាង ស្រីពៅ បានបំភ្លឺថា ពិតជាមានការប្តឹងពីព្រះសង្ឃអង្គនោះមែនទារលុយពីនាងកាលពីពេល ថ្មីៗនេះ ប៉ុន្តែនាងថា ការប្តឹងទារលុយនោះជារឿងមិនសមទាល់តែសោះ ដោយសង្ឃអង្គនោះឱ្យនាងចាយបន្តបន្ទាប់៤ឆ្នាំមកហើយ មិនដែលគិតថា ជាលុយឱ្យខ្ចីទេ ។
ស្ត្រីរូបនេះបន្តថា នាងមិនមែនអ្នកបោកទេ ផ្ទុយទៅវិញសង្ឃអង្គនោះទេ ជាអ្នកបោកនាងព្រោះកន្លងមកពេលមានបុរសម្នាក់ចូលស្តីដណ្តឹងនាង សង្ឃអង្គនោះតែងតែប្រើគ្រប់រូបភាពមិនឱ្យគេចូលដណ្តឹងនាងទេ ។ រឿងដែលគួរឱ្យចាប់អារម្មណ៍មួយទៀតគឺនៅយប់ថ្ងៃទី៣ ឧសភា មុនថ្ងៃដែលនាងរៀបការ សង្ឃអង្គនោះទាក់ទងនាងតាមទូរស័ព្ទថា «បើអាចទៅរួចទៅឱ្យហើយទៅ បើចាំរៀបការរួចដោះខ្លួនមិនរួចទេ» ។ មិនតែប៉ុណ្ណោះ នៅព្រឹកថ្ងៃទី៤ ឧសភា សង្ឃអង្គនោះថែមទាំងឱ្យអ្នករត់ម៉ូតូឌុបយកលុយឱ្យនាងចំនួន១០ម៉ឺន រៀល ដើម្បីទិញសំបុត្ររថយន្តជិះទៅស្រុកទៀតផង ហើយម្តាយរបស់សង្ឃនេះបានទូរស័ព្ទសួរនាងថា «ដល់ណាហើយ» ហាក់ដូចជាចង់ពង្វៀងនាងមិនឱ្យរៀបការ ។
ស្ត្រីរូបនេះប្រាប់ថា កន្លងមក នាងតែងតែប្រាប់សង្ឃអង្គនោះថា បើស្រឡាញ់នាងសឹកទៅ ហើយចូលដល់ឪពុកម្តាយ គឺនាងនឹងទទួល ប៉ុន្តែសង្ឃអង្គនោះមិនព្រមទេ ។ លុះដឹងថា នាងជិតរៀបការ ស្រាប់តែសង្ឃនោះ ប្តឹងទារលុយដែលឱ្យនាងចាយទាក់ចិត្តកន្លងមក ទើបនាងដឹងការពិតថា សង្ឃនោះលួចស្រឡាញ់នាង ។
នាងហ៊ាន ស្រីពៅ បានរៀបការជាមួយបុរសឈ្មោះនៅ សុវណ្ណ អាយុ៣៧ឆ្នាំ នៅថ្ងៃទី៧ ឧសភា ។ បុរសជាប្តីបានប្រាប់ថា មុនថ្ងៃរៀបការដោយសារការប្តឹងរបស់សង្ឃនោះធ្វើឱ្យលោក និងប្រពន្ធខ្មាសគេ ហើយក៏បានខាតបង់ពេលវេលាជាច្រើន ដោយសារតែត្រូវចំណាយពេលរត់ការរឿងនោះ ។
ប្តីប្រពន្ធ ប្រាប់ថាថ្មីៗនេះពួកគេ បាននាំគ្នាទៅប្តឹងអង្គការមួយ ដើម្បីឱ្យជួយរកយុត្តិធម៌ ។ សូមបញ្ជាក់ថា នាងហ៊ាង ស្រីពៅ មុនពេលរៀបការជាស្ត្រីមេម៉ាយកូន២ ។ ចំណែកសង្ឃដើមបណ្តឹងមានសង្ឃដីកាថា ការឱ្យខ្ចីលុយគឺដោយសារយល់ថា នាងស្រីពៅជាអ្នកស្រុកនៅខេត្តព្រៃវែងដូចគ្នា ៕
ไม่มีความคิดเห็น:
แสดงความคิดเห็น