ខេត្តព្រះសីហនុ ៖ ភ្ញៀវទេសចរប្រមាណ៦០.០០០ម៉ឺននាក់ជាចំនួនច្រើនជាងថ្ងៃបុណ្យចូល ឆ្នាំប្រពៃណីជាតិទៅទៀត បានសំរុកចូលកំសាន្តនៅឆ្នេរសមុទ្រខេត្តព្រះសីហនុនាឱកាសបុណ្យ ចម្រើនព្រះជន្មព្រះករុណាសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាឆ្នាំ២០១១នេះ។ អ្នកទេសចរមកពីរាជធានីភ្នំពេញឱ្យដឹងថា ការមកកំសាន្តនៅទីនេះគាត់សប្បាយរីករាយណាស់ ព្រោះតែទេសភាព និងមានខ្យល់អាកាសដ៏បរិសុទ្ធ ហើយគាត់នឹងស្នាក់នៅរយៈពេល២ថ្ងៃទៀត ព្រោះការឈប់សំរាកនាឱកាសនេះមានរយៈពេលយូរ។ ប៉ុន្តែអ្វីដែលគួរឱ្យសោកស្តាយនោះ គឺតម្លៃកន្លែងអង្គុយឡើងថ្លៃខ្ពស់កប់ពពក ដូចជាសម្រាប់តុមួយមានតម្លៃពី៣០ទៅ៤០ដុល្លារ។
ធ្វើបែបនេះហាក់បីដូចជាយកភ្ញៀវទេសចរធ្វើ ជាចំណាប់ខ្មាំងទេសចរណ៍ ដើម្បីជម្រិតទារប្រាក់អ៊ីចឹង ។ ការឆក់ឱកាសបែបនេះអាជ្ញាធរគ្រប់ជាន់ថ្នាក់គួរតែណែនាំដល់ អាជីវករដែលប្រកបមុខរបរលក់ដូរតាមឆ្នេរសមុទ្រផង ធ្វើយ៉ាងណា ឱ្យពួកគេអនុវត្តការលក់ដូរសុចរិត ដើម្បីរក្សាទំនុកចិត្តពីភ្ញៀវទេសចរណ៍ បើមិនដូច្នេះទេ ភ្ញៀវនឹងរត់ចោលជាមិនខាន ព្រោះគេខ្លាចរអា ចំពោះការឡើងថ្លៃទំនិញដូចកាប់ឆៅ ឬកោរមិនដាក់ទឹកបែបនេះ។ មិនតែ ប៉ុណ្ណោះ លំហូរទេសចរណ៍នៅខេត្តមួយនេះនឹងត្រូវថយ ឬបាត់បង់ជាក់ជាពុំខាន។
លោកសោម ចិន្តា ប្រធានមន្ទីរទេសចរណ៍ខេត្តព្រះសីហនុឱ្យដឹងថា ឱកាសបុណ្យចម្រើនព្រះជន្មព្រះមហាក្សត្រនាឆ្នាំ២០១១នេះ មន្ត្រីរាជការ និងប្រជាពលរដ្ឋកម្ពុជាបានសម្រាករយៈពេលយូរថ្ងៃជាហេតុធ្វើ ឱ្យមានពេលដើរកំសាន្ត រីឯបុណ្យចូលឆ្នាំថ្មីកន្លងទៅនេះមានភ្ញៀវទេសចរទៅកំសាន្តនៅ មាត់សមុទ្រមានចំនួនតិចជាង ព្រោះតាមប្រពៃណីខ្មែរយើងឱ្យតែដល់ពេលបុណ្យចូលឆ្នាំតែងតែធ្វើ ដំណើរទៅស្រុកកំណើតដើម្បីជួបជុំក្រុមគ្រួសារច្រើនជាងដើរកំសាន្ត ដូច្នេះមិនសូវមានពេលវេលាសម្រាប់ដើរលេងនោះទេ។ លោកឱ្យដឹងថា ក្នុងពិធីបុណ្យចម្រើនព្រះជន្ម ព្រះមហាក្សត្រនេះមានភ្ញៀវទេសចរជាតិ និងអន្តរជាតិប្រមាណពី៦០.០០០ទៅ ៧០.០០០មឺុននាក់គឺមានការកើនឡើងបើធ្វើការប្រៀបធៀបទៅនឹងពិធី បុណ្យនេះកាលពីឆ្នាំ២០១០។
លោកប្រធានមន្ទីរទេសចរណ៍ខេត្តដដែលបានសំណូមពរ ដល់ម្ចាស់ផ្ទះសំណាក់ សណ្ឋាគារ និងអាជីវករលក់ដូរនៅ ក្នុងក្រុងព្រះសីហនុឱ្យសហការជាមួយអាជ្ញាធរដែនដីដើម្បីរក្សា វិស័យទេសចរណ៍នៅខេត្តព្រះសីហនុឱ្យកាន់តែរឹងមាំឡើង។ លើសនេះទៀតសំណូមពរដល់ភ្ញៀវទេសចរជាតិឱ្យជួយរក្សាអត្តសញ្ញាណ ជាតិ និងជួយថែរក្សាអនាម័យនៅតាមទីតាំងរមណីយដ្ឋាន និងកន្លែងទេសចរណ៍នានា ។ បញ្ហាទំនិញឡើងថ្លៃកប់ពពកនៅតែជាបញ្ហាចំបងដែលមិនអាចលុបបំបាត់ បានឡើយ។ ការដំឡើងថ្លៃស្រេចតែចិត្តរបស់អ្នកលក់ដូរនេះបានបង្ហាញថា មិនមានការកែលំអ និងមិនទាន់មានការយកចិត្តទុកដាក់ពីអាជ្ញាធរនៅឡើយទេ ៕
ไม่มีความคิดเห็น:
แสดงความคิดเห็น