Monday, 01 August 2011 15:06
សែន ដាវីត - David Boyle
ភ្នំពេញៈ បន្ទាប់ពីវិលត្រឡប់មកដល់ប្រទេសកម្ពុជាវិញ កាលពីថ្ងៃសុក្រ លោក ទិត្យ សុភ័ក្រ្ត ជនរងគ្រោះ នៃអំពើជួញដូរមនុស្សបានព្រមានទៅដល់ប្រជាជនកុំឲ្យជឿលើការ សន្យារបស់ពួកមេខ្យល់។
លោកបានថ្លែងថា៖ «ខ្ញុំស្រក់ទឹកភ្នែក
ពេលឃើញពលកររងគ្រោះឯទៀត។ វាមានស្ថានភាពដូចនៅឋាននរក។
មានជនកម្ពុជាជាច្រើននាក់ មិនមែនត្រឹមតែ១០០នាក់នោះទេ
គឺប្រមាណជា១០០០នាក់កំពុងនៅលើទូក»។លោកអះអាងថា បុរសកម្ពុជាដែលរងគ្រោះដូចជារូបលោក ត្រូវឈ្មួញលក់ឲ្យទៅទូកនេសាទថៃនិងម៉ាឡេស៊ីដើម្បីធ្វើជាទាសករ និងស្ថិតក្រោមការរំលោភបំពានដ៏គួរតក់ស្លុតបំផុត។
អ្នកទាំងឡាយដែលគេគិតថាទុកមិនចំណេញ ដោយសារតែជំងឺឬគ្មានកម្លាំង បន្ទាប់ពីធ្វើការ២២ម៉ោងក្នុងមួយថ្ងៃៗ ត្រូវ គេវាយដំច្រំធាក់ ហើយបន្ទាប់មកគេបោះចូលក្នុងសមុទ្រចិនខាងត្បូងឲ្យស្លាប់យ៉ាង អាណោចអាធ័ម។ លោក ទិត្យ សុភ័ក្រ្ត និងបុរស៦នាក់ផ្សេងទៀត ជាអ្នកមានសំណាងដែលបានលោតចេញពីទូកនិងត្រូវជួយសង្គ្រោះនៅ ម៉ាឡេស៊ី ហើយបន្ទាប់មកពួកគេបានវិលត្រឡប់មកផ្ទះវិញកាលពីថ្ងៃសុក្រ។
លោក ទិត្យ សុភ័ក្រ្ត អាយុ២៩ឆ្នាំ បានថ្លែងនៅអាកាសយានដ្ឋានអន្តរជាតិភ្នំពេញថា៖ «ពួកគេធ្វើបាបយើងណាស់។ គេវាយយើង ហើយប្រជាជនកម្ពុជាជាច្រើននាក់បានស្លាប់បាត់បង់ជីវិតនៅក្នុង សមុទ្រ។ ខ្ញុំបានសម្រេចចិត្តលោតទឹក។ ខ្ញុំគិតថា ប្រសិនបើខ្ញុំមានសំណាង ខ្ញុំនឹងមានជីវិត។ ខ្ញុំហែលទឹក ២០០ម៉ែត្រ ហើយបានទៅដល់ប្រទេសម៉ាឡេស៊ី»។
អ្នកស្រី ចន្ទ ផល្លី ម្តាយជនរងគ្រោះឈ្មោះ នូវ វុទ្ធី អាយុ២១ឆ្នាំ ដែលបានវិលត្រឡប់មកផ្ទះវិញពីថ្ងៃសុក្រដែរនោះ បានថ្លែងថា អ្នកស្រីបានព្រមានកូនប្រុសថា ការសន្យាផ្តល់ការងារដោយឲ្យប្រាក់កម្រៃច្រើនក្នុងប្រទេសថៃពី មេខ្យល់ជារឿងគ្រោះថ្នាក់ ប៉ុន្តែ កូនប្រុសអ្នកស្រីនៅតែមានះ។
ខណៈកំពុងរង់ចាំស្វាគមន៍កូនប្រុសដែលខានឃើញមុខជាច្រើនខែ មកហើយ គាត់បាននិយាយថា៖ «ខ្ញុំធ្លាក់ខ្លួនឈឺ នៅពេលកូនប្រុសទូរស័ព្ទមក ហើយប្រាប់ខ្ញុំថាវាត្រូវមេខ្យល់លក់ឲ្យឡើងទូកនេសាទថៃ»។
បន្ទាប់ពីបានជួបម្តាយ លោក នូវ វុទ្ធី បានថ្លែងថា៖«ខ្ញុំនឹកសាច់ញាតិណាស់ ជាពិសេសម្តាយខ្ញុំឥឡូវនេះ ខ្ញុំមានអារម្មណ៍ថា ដូចទើបកើតម្តងទៀត»។
លោក ហ៊ុយ ពេជ្យសុវណ្ណ មន្រ្តីកម្មវិធីនៃមជ្ឈមណ្ឌលអប់រំច្បាប់សម្រាប់សហគមន៍បាន ថ្លែងថា បើទោះជាបុរសទាំង ៦នាក់បានវិលមកផ្ទះវិញក៏ដោយ ក៏ប៉ុន្តែ អនាគតពួកគេនៅតែមិនប្រាកដប្រជានៅឡើយ។
លោកថ្លែងថា៖«ពួកគេនៅតែបារម្ភពីជីវិតរបស់ខ្លួន។ ពួកគេគ្មានការងារធ្វើ ហើយគ្មានចំណូល ...វាពិបាករកការងារធ្វើ ឬផ្តល់ការបណ្តុះបណ្តាល»។
ប៉ុន្តែពេលវិលមកវិញនេះបុរសទាំងនេះបានទទួលអំណោយជាមី ត្រីខ និងប្រាក់១០ដុល្លារអាមេរិកពីកាកបាទក្រហមកម្ពុជា ហើយប្រហែលអាចរកការងារខ្លះជាអ្នកផ្សព្វផ្សាយដែលទទួលបាន ប្រាក់ខែ ដើម្បីប្រាប់អ្នកដទៃទៀតពីភាពតក់ស្លត់ដែលពួកគេបានឆ្លងកាត់ ។
លោក ពេជ្រសុវណ្ណ បានបញ្ជាក់ថា ពួកគេភាគច្រើនចង់បើកអាជីវកម្មខ្លួនឯង ប៉ុន្តែ ពួកគេមិនដឹងពីជំនួយហិរញ្ញវត្ថុពីរដ្ឋាភិបាលទេ។
លោក ស៊ុន បារាំង អាយុ ៤៧ឆ្នាំ ជាជនរងគ្រោះម្នាក់ដែរបានថ្លែងថា លោកនឹងមិនធ្វើខុសចេញទៅរកការងារនៅក្រៅប្រទេសទៀតទេ។ លោកថ្លែងថា៖ «ខ្ញុំនៅមានជីវិតនេះជាសំណាងរបស់ខ្ញុំ ខ្ញុំអត់ចេះអក្សរ ហើយខ្ញុំមិនដឹងធ្វើអ្វីទេ នៅថ្ងៃអនាគត។ ខ្ញុំគ្រាន់តែចង់នៅនិងម្តាយឲ្យសប្បាយចិត្ត។ ខ្ញុំជាបុរស ខ្ញុំមិនយំទេ»។
លោក ប៊ិត គឹមហុង ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន នៅក្រសួងមហាផ្ទៃ បានថ្លែងថា ការស៊ើបអង្កេតកំពុងធ្វើ និងកំណត់អត្តសញ្ញាណ និងចាប់ខ្លួនមេខ្យល់ដែលជួញដូរបុរសទាំងនេះ នៅចុងឆ្នាំមុននិងដើមឆ្នាំ ២០១១នេះ៕ TK
រាយការណ៍បន្ថែម វង្ស សុខេង
ไม่มีความคิดเห็น:
แสดงความคิดเห็น