ដោយ ទីន ហ្សាការីយ៉ា
2011-08-21
ការកាប់ព្រៃឡង់នៅក្នុងស្រុកសណ្ដាន់ ខែត្រកំពង់ធំ ក្រៅពីក្រុមហ៊ុនដែលទទួលបានអាជ្ញាប័ណ្ណពីរដ្ឋាភិបាលនោះ គឺសកម្មជនការពារព្រៃឈើបានចោទប្រកាន់ថា នៅមានឈ្មួញចូលកាប់ព្រៃឈើនៅតំបន់ព្រៃឡង់យ៉ាងអនាធិបតេយ្យ។សកម្មជនការពារព្រៃឈើចំនួនបីនាក់ ត្រូវបានអាជ្ញាធរស្រុកសណ្ដាន់ឃាត់ខ្លួននៅអធិការដ្ឋានស្រុកសណ្ដាន់ អស់រយៈជាង ៣ម៉ោង កាលពីល្ងាចថ្ងៃទី២០ សីហា បន្ទាន់ពីពួកគាត់បានសួរនាំរថយន្តដឹកឈើឲ្យឈ្មួញឈ្មោះអ្នកស្រី លី គឹមហុង ចំនួន ៧គ្រឿង។
ប្រធានអង្គការការពារធនធានធម្មជាតិ លោក ឈុត វុទ្ធី មានប្រសាសន៍នៅថ្ងៃទី២១ សីហាថា រួបលោក និងតំណាងសហគមន៍ព្រៃឡង់ចំនួនពីរនាក់ទៀត ត្រូវបានកម្លាំងសមត្ថកិច្ចចំនួន ៨នាក់ ប្រដាប់ដោយអាវុធ ដឹកនាំដោយអធិការរងស្រុកសណ្ដាន់ ឈ្មោះ ញ៉ែម ដុន បានឃាត់ខ្លួនពួកគាត់ពីម៉ោង ៥កន្លះល្ងាច ដល់ម៉ោង ៨យប់ ទើបគេដោះលែងវិញ ៖ "ខ្ញុំចេះតែឆ្ងល់ថា ថ្ងៃហ្នឹងមានប៉ូលិសតាមច្រើនម្ល៉េះ ពេលខ្ញុំចូលទៅមើលដើមជ័រ ស្រាប់តែពេលចេញមកវិញដល់ស្ពាន មុខស្រុកជិតវត្តហ្នឹង ស្រាប់តែប៉ូលិសចេញមកព្រូមានកាំភ្លើងគ្រប់ដៃ"។
លោក ឈុត វុទ្ធី បានបញ្ជាក់ថា ការឃាត់ខ្លួនពួកគាត់នេះ គឺជាការគំរាមកំហែង ពីព្រោះថា កាលពីថ្ងៃទី១៩ សីហា លោកបានទៅបង្រៀនប្រជាពលរដ្ឋនៅក្នុងឃុំមានរិទ្ធិ ស្រុកសណ្ដាន់ ប្រមាណ ៧០នាក់ អំពីច្បាប់ភូមិបាល និងច្បាប់ការពារព្រៃឈើ ក្រោយមកពួកលោកក៏ចូលទៅក្នុងព្រៃក៏ឃើញគោយន្តដឹកឈើចំនួន ៧គ្រឿង ក៏បានថតទុកជាភស្តុតាង។ ហើយកន្លងមក ប្រជាពលរដ្ឋមានការភ័យខ្លាច ដោយចោទប្រកាន់អាជ្ញាធរគំរាមសម្លាប់ប្រជាពលរដ្ឋក្នុងការការពារ ព្រៃឈើ ៖ "គំរាមកំហែងសម្លាប់តែម្ដងក្នុងរយៈកាលកន្លងទៅនេះ រហូតដល់ប៉ូលិសអាមេកាំភ្លើងបាញ់គំរាមកំហែងប្រជាពលរដ្ឋទៀតផង ឥឡូវនេះប្រជាពលរដ្ឋបាក់ស្បាតហើយ"។
អធិការស្រុកសណ្ដាន់ លោក ញ៉ែម ដុង បានបដិសេធថា ការឃាត់ខ្លួនអ្នកទំាងបី ដោយសារតែមានប្រជាពលរដ្ឋប្ដឹងថា លោក ឈុត វុទ្ធី និងអ្នកភូមិពីរនាក់ទៀត បានវាយបែកកញ្ចក់ឡានដឹកឈើ។ ទាក់ទងទៅនឹងករណីនេះ វិទ្យុអាស៊ីសេរីបានសួរថា តើមូលហេតុអ្វីបានសមត្ថកិច្ចមិនចាប់ឡានដឹកឈើនោះទៅវិញ? លោកប្រាប់ថា ឲ្យសួរទៅថ្នាក់លើ ៖ "អាហ្នឹងជារឿងរបស់ខាងលើ គេគិតគូរយ៉ាងម៉េច ខ្ញុំមិនសូវដឹងដែរ សួរទៅខាងរដ្ឋបាលព្រៃឈើ"។
ទោះជាយ៉ាងនេះក្ដី ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ មានប្រសាសន៍ថា អាជ្ញាធរមានតួនាទីការពារប្រជាពលរដ្ឋ ផ្ទុយទៅវិញ អាជ្ញាធរបានការពារក្រុមហ៊ុនឈ្មួញបែបនេះ វាពាក់ព័ន្ធទៅអំពើពុករលួយ ដែលជារឿងខុសនឹងច្បាប់ ៖ "មិនមែនតែ ក្រុមហ៊ុនដីសម្បទានទេ ដែលកាប់ឈើ ឥឡូវនេះនៅកន្លែងនោះ គឺកាប់ឈើយ៉ាងអានាធិបតេយ្យ អ្នកកាប់បានប៉ុនណា យកប៉ុណ្ណឹង អ៊ីចឹងហើយបានជាសមត្ថកិច្ចមិនរារាំងនោះ"។
លោក ឈុត វុទ្ធី បានបន្ថែមថា នៅថ្ងៃទី២១ សីហា លោកក៏បានទៅបង្រៀនអ្នកភូមិនៅក្នុងឃុំដងកាំបិតទៀត តែត្រូវបានប្រធានប៉ុស្តិ៍នគរបាលឃុំទៅប្រាប់លោក មិនអនុញ្ញាតបង្រៀនអំពីច្បាប់ភូមិបាល ឬច្បាប់ការពារព្រៃឈើអ្វីទេ។
ទាក់ទងទៅនឹងបញ្ហាការពារព្រៃឡង់នេះ កាលពីថ្ងៃទី១៨ ខែសីហា ឆ្នាំ២០១១ ប្រជាពលរដ្ឋសហគមន៍ព្រៃឡង់ប្រមាណ ១០០នាក់ ត្រូវសមត្ថកិច្ចក្រុងភ្នំពេញចាប់ខ្លួននៅខណៈក្រុមប្រជាសហគមន៍ ទាំងនោះចែកខិត្តប័ណ្ណនៅតាមស្ដុបមួយចំនួនក្នុងរាជធានីភ្នំពេញ ដែលមានខ្លឹមសារថា ការពារព្រៃឡង់ និងលុបចោលដីសម្បទានសេដ្ឋកិច្ចទៅឲ្យក្រុមហ៊ុនឯកជនជាដើម។
ការចាប់ខ្លួនប្រជាសហគមន៍ទាំងនោះ ធ្វើឡើងក្រោយពេលក្រុមសហគមន៍ព្រៃឡង់ជាង ២០០នាក់ តំណាងឲ្យប្រជាពលរដ្ឋចំនួន ១១៩សហគមន៍ មកពីខេត្តក្រុងចំនួន១៩ បានមកប្រជុំគ្នានៅព្រះអង្គដងកើ នៅទន្លេបួនមុខក្បែរព្រះបរមរាជវាំងដើម្បីបួងសួងសុំឲ្យមានការ គាំទ្រ និងថែរក្សាព្រៃឡង់ ព្រមទាំងធនធានធម្មជាតិនៅក្នុងប្រទេសកម្ពុជា៕
ไม่มีความคิดเห็น:
แสดงความคิดเห็น