ដោយ ឡេង ម៉ាលី
2011-06-30
២៩-មិថុនា-២០១១១៖ ព្រះសង្ឃចូលរួមសង្កេតមើលដំណើរការនៃអង្គសវនាការបឋមលើសំណុំរឿង ០០២ ថ្ងៃទី៣ ដែលមានជនជាប់ចោទ នួន ជា, ខៀវ សំផន, អៀង សារី និង អៀង ធិរិទ្ធ។
មេធាវីការពារបានឱ្យដឹងថា ជនជាប់ចោទ នួន ជា លើកឡើងពីការចាំបាច់ ដែលត្រូវស៊ើបអង្កេតរឿងនេះ ព្រោះថា សេចក្ដីសម្រេចនៅក្នុងរបបកម្ពុជាប្រជាធិបតេយ្យជាច្រើន ធ្វើឡើងដោយសារតែគោលនយោបាយរបស់ប្រទេសវៀតណាម។
មេធាវីជនជាប់ចោទ នួន ជា ក៏បានលើកហេតុផលដែរថា ការទម្លាក់គ្រាប់បែក ក៏ត្រូវតែមានការស៊ើបអង្កេតដែរ ដើម្បីឱ្យដឹងច្បាស់ថា តើមានវិបត្តិស្បៀងអាហារទេនៅមុនឆ្នាំ ១៩៧៥។ ប្រសិនបើមានមែន តើមានផលប៉ះពាល់អ្វីខ្លះដល់ប្រជាជនកម្ពុជា? តើរដ្ឋាភិបាលកម្ពុជាប្រជាធិបតេយ្យមានលទ្ធភាពដោះស្រាយបញ្ហានេះបាន ទេ?
មេធាវីជនជាប់ចោទ នួន ជា លើកឡើងទៀតថា វាជាការចាំបាច់ណាស់ដែរ ដែលត្រូវស៊ើបអង្កេតមេបញ្ជាការយោធាខ្មែរក្រហម នៅភូមិភាគបូព៌ា ដែលខាងគណៈមជ្ឈិមគ្មានតួនាទីអនុវត្តអំណាចរបស់ខ្លួនបាន។
ជនជាប់ចោទ នួន ជា ក៏បានសុំឱ្យស៊ើបអង្កេតលើសេចក្ដីថ្លែងការរបស់ ឌុច ដែរ ដែលថា រូបគាត់ជាអ្នកឃោរឃៅទាក់ទងនឹងឧក្រិដ្ឋកម្មនៅគុកទួលស្លែង។
ចំណែកជនជាប់ចោទ ខៀវ សំផន ក៏បានតវ៉ាដល់អង្គសវនាការដែរថា នៅក្នុងបញ្ជីឈ្មោះសាក្សីរបស់សាលាក្ដីមិនមានឃើញមានឈ្មោះសាក្សី របស់គាត់ទេ គឺភាគច្រើនបំផុតឃើញតែសាក្សីរបស់ព្រះរាជអាជ្ញា។ មានឈ្មោះសាក្សីខ្លះរបស់គាត់ បែរទៅជាសាក្សីរបស់ព្រះរាជអាជ្ញាសម្រាប់ចោទប្រកាន់ទៅវិញ។ ជនជាប់ចោទ ខៀវ សំផន សន្យាថា គាត់នឹងដាក់បញ្ជីឈ្មោះជាលាយលក្ខណ៍អក្សរម្ដងទៀត។ គាត់សំណូមពរឱ្យអង្គសវនាការស្ដាប់ខាងគាត់ផង បើចង់ដឹងច្បាស់ ព្រោះកន្លងមកគេនិយាយពីគាត់ច្រើនពេកហើយ៕
ไม่มีความคิดเห็น:
แสดงความคิดเห็น