សម្លាប់​​គ្រូសូត្រ​​​ស្តាំ​នៅ​វត្ត​​ទួល​​សាលា​​​គេចខ្លួន​​​ជិត​​៤​ឆ្នាំ​​ចូល​​ផ្ទះវិញ​​​ត្រូវ​ជាប់ខ្នោះ

ខេត្ត​កណ្តាល​ ៖ បុរសម្នាក់ជាប់​ចោទ​ពីបទ​ធ្វើគុតព្រះសង្ឃដែលជាគ្រូសូត្រស្តាំនៅ​វត្តទួល​ សាលា ស្រុកកណ្តាលស្ទឹង កាលពីថ្ងៃទី២៨ ខែ​សីហា ឆ្នាំ២០០៧ រួច​បានរត់គេច​ខ្លួនអស់​រយៈ​ពេលជិត៤ឆ្នាំមកហើយ​នោះត្រូវបានសមត្ថកិច្ច​ ប៉ូលិសស្រុកកណ្តាលស្ទឹងធ្វើការឃាត់ខ្លួនរួច​បញ្ជូនទៅ​ កាន់សាលាដំបូងខេត្តកាលពី​ព្រឹក​ថ្ងៃទី​២០ មិថុនា ។

លោកស៊ឹម ប៊ុតបណ្ឌិត អធិការនគរបាល​ស្រុកកណ្តាលស្ទឹងបានឱ្យដឹងថា ជនសង្ស័យ​ដែល​ឃាត់ខ្លួននោះឈ្មោះសាន ប៊ុនសឿង ភេទ​ប្រុស អាយុ៣០ឆ្នាំ មានទីលំនៅភូមិ​អន្លុង​រមៀត​​ខាងត្បូង ឃុំអន្លង់រមៀត ស្រុកកណ្តាល​ស្ទឹង ត្រូវ​បានចាប់ខ្លួនតាមដីការបស់សាលា​ដំបូងខេត្ត កាលពី​​ថ្ងៃទី១៩ មិថុនា ចោទប្រកាន់ពីបទ​មនុស្ស​​ឃាតដោយ​ចេតនា ប្រព្រឹត្តឡើងក្នុងវត្ត​ទួល​សាលា ភូមិដើមត្រាំង ឃុំអន្លង់រមៀត ស្រុក​​កណ្តាលស្ទឹង កាលពីថ្ងៃទី២៨ ខែសីហា ឆ្នាំ ២០០៧ ។ រីឯព្រះសង្ឃជាគ្រូសូត្រ​ស្តាំដែល​ជន​សង្ស័យវាយសម្លាប់​នាមយួន សន ព្រះជន្ម​៧៨ឆ្នាំ គង់នៅវត្តទួលសាលា ។

ជនសង្ស័យ សាន ប៊ុនសឿន បានសារភាព​ថា នៅយប់ថ្ងៃទី២៨ ខែសីហា ឆ្នាំ​២០០៧នោះ រូបគេបានផឹកស្រាស្រវឹងហើយបានដើរចូល​ទៅក្នុងបរិវេណវត្តទួលសាលា​ក្នុងគោលបំណង ទៅរកវាយព្រះសង្ឃរងគ្រោះខាងលើ ។ ពេល​​នោះ​​ខ្លួនបានរើសយកដំបងឈើជ្រុងប្រវែង១​ម៉ែត្រនៅ​ ក្បែរអណ្តូងទឹកខាងកើតកុដិធ្វើជា​អាវុធ​ ស្របពេលព្រះ​សង្ឃយួន សន បាននិមន្ត​ចេញពីកុដិមកបត់ជើងតូច ខ្លួនក៏​ស្ទុះ​ទៅវាយ​នឹង​ដំបងចំ​សៀតផ្កាខាងឆ្វេង និងព្រះកេស​ពីក្រោយ​ បណ្តាលឱ្យ​ព្រះសង្ឃយួន សន ដេក​ដួលទៅ​នឹងដី​ បន្ទាប់​មក​ខ្លួនក៏ដើរត្រឡប់​ទៅផ្ទះ​វិញ​ ធ្វើ​​មិន​ដឹង​មិនឮអ្វីទាំង​អស់​ ។

លុះ​​មួយ​ថ្ងៃ​ក្រោយមក​ ដោយ​ដឹងថា​ មិន​​ស្រួល​ខ្លួន​ក៏រត់​គេច​មកធ្វើ​កម្មករ​ធ្វើនំតែលាវនៅរាជធានី​ភ្នំពេញ និង​បន្ត​រត់គេចខ្លួនទៅ​នៅតាមខេត្តផ្សេងៗ​។ រហូតមក​ដល់ថ្ងៃទី១៩ ខែមិថុនា ឆ្នាំ២០១១ ​ខ្លួនបាន​មក​លេងផ្ទះ​នៅអន្លង់រមៀតវិញ​ ស្រាប់តែត្រូវ​សមត្ថ​កិច្ចចាប់​ខ្លួន​តែម្តង។ សាន ប៊ុនសឿង បានសារ​ភាព​​ទៀត​ថា មូលហេតុដែលរូបគេលួចធ្វើ​​គុត​សង្ឃ​អង្គ​នោះដោយសារតែខឹងនឹងលោក​ជេរ​ ដៀលរូបគេដែលបានលួចបេះផ្លែដូងនៅ​ក្នុង​វត្តទួលសាលា ៕