ខេត្តកណ្តាល ៖
សិប្បកម្មកែច្នៃប្រេងខ្មៅរបស់ជនជាតិចិនមួយកន្លែងមានទីតាំង
នៅក្នុងភូមិព្រែកតាតិន ឃុំស្វាយប្រទាល
ស្រុកស្អាងកំពុងដំណើរការចំហុយចម្រាញ់ ប្រេងខ្មៅយ៉ាងសកម្ម
ហើយបានធ្វើឱ្យមានផលប៉ះពាល់ដល់បរិស្ថានអ្នកស្រុកយ៉ាងធ្ងន់ធ្ងរ
ដែលមានក្លិនស្អុយអសោចិ៍ ស្ទើរតែដកដង្ហើមមិនរួច ។
សិប្បកម្មមួយនេះត្រូវបានមន្ត្រីសាលាស្រុក
ស្អាងអះអាងថា អត់មានច្បាប់ត្រឹមត្រូវទេ ហើយកាលពីអំឡុងខែមីនា
ឆ្នាំ២០១១ កន្លងមក ខាងមន្ត្រីជំនាញខេត្ត បានចុះទៅ
ពិនិត្យដល់ទីតាំងនោះ
និងបានធ្វើកិច្ចសន្យាឱ្យបញ្ឈប់ការចម្រាញ់ប្រេងខ្មៅនេះម្តងរួច
មកហើយ ។ ប្រជាពលរដ្ឋក៏ដូចជាអាជ្ញាធរមូលដ្ឋាន
បានប្រាប់ឱ្យដឹងថា
ទីតាំងសិប្បកម្មែកច្នៃប្រេងខ្មៅដែលមានទីតាំងនៅក្នុងភូមិព្រែក
តាតិន ឃុំស្វាយប្រទាល ស្រុកស្អាង
បានដំណើរការអស់រយៈពេលពីរឆ្នាំមកហើយ ដែលគេស្គាល់ថា
ម្ចាស់សិប្បកម្មនេះជាជនជាតិចិន មានអ្នកច្ចេកទេស និងកម្មករ
ក៏ជាជនជាតិចិនដែរ ។
រយៈពេល២ឆ្នាំដែលសិប្បកម្មមួយនេះ ដំណើរការ
បានដឹកប្រេងខ្មៅតាមរថយន្តយកមកចម្រាញ់កែច្នៃធ្វើជាប្រេងបាត
(ប្រេងរំអិល) និងប្រេងម៉ាស៊ូតផងដែរ ។ ប្រជាពលរដ្ឋបានឱ្យដឹងទៀតថា
ប្រេងដែលចម្រាញ់បានហើយរយៈពេល១០ថ្ងៃទៅ១៥ថ្ងៃ គេឃើញរថយន្ត ស៊ីទែន
មកដឹកប្រេងយកចេញម្តងៗរាប់ម៉ឺនលីត្រ ។ ទន្ទឹមនឹងនេះ
ប្រជាពលរដ្ឋបានត្អូញត្អែរ
ពីផលប៉ះពាល់ដែលភាយចេញពីសិប្បកម្មមួយនេះថា
មានក្លិនភាយស្អុយអសោចិ៍យ៉ាងខ្លាំងបានចូលមកក្នុងភូមិធ្វើឱ្យមានការ
លំបាកក្នុងការរស់នៅបំផុត ។
ចំណែកអ្នកធ្វើដំណើរឆ្លងកាត់មុខសិប្បកម្មមួយនេះគ្រប់ៗគ្នាអត់
ហ៊ានដកដង្ហើម គឺទ្រាំស្ទើរដាច់ខ្យល់ទំរាំរត់ឆ្លងកាត់ផុត ។
ប្រភពបន្តថា កន្លងមក
ពួកគាត់បានប្តឹងដោយផ្ទាល់មាត់ទៅខាងអាជ្ញាធរឃុំផងដែរ
ហើយខាងអាជ្ញាធរឃុំបានប្រាប់មកវិញថា នឹងរាយការណ៍ទៅស្រុក
ដើម្បីដោះស្រាយជូន។ នៅអំឡុងខែមីនា ឆ្នាំ ២០១១
គេឃើញសមត្ថកិច្ចជំនាញបានចុះមកពិនិត្យ
ឯសិប្បកម្មនេះបានផ្អាកដំណើរការមួយរយៈពេលខ្លីប៉ុណ្ណោះ
ហើយក៏ដំណើរការឡើងវិញដដែល ។
មន្ត្រីបរិស្ថានស្រុកស្អាងបានឱ្យដឹងថា
សិប្បកម្មមួយនេះ មិនមានច្បាប់ត្រឹមត្រូវឱ្យដំណើរការទេ
តែមានច្បាប់ឱ្យសាកល្បងហើយកម្លាំងជំនាញក៏ពិបាកក្នុងការជួបជាមួយ
ម្ចាស់សិប្បកម្មនេះដែរ ព្រោះជាជនជាតិចិន
ហើយខាងបរិស្ថានស្រុកក៏បានរាយការណ៍ទៅថ្នាក់ខេត្តផងដែរ ។
លោកមឿន ស៊ីដែន ប្រធានការិយាល័យរ៉ែ និងថាមពល
ស្រុកស្អាង បានឱ្យដឹងថា សិប្បកម្ម ចម្រាញ់ប្រេងខ្មៅមួយនេះ
ខាងជំនាញថ្នាក់ខេត្ត
បានចុះមកធ្វើកិច្ចសន្យាបញ្ឈប់ម្តងរួចមកហើយ ក្រោយមកទៀត
លោកមិនដឹងថា សិប្បកម្មនេះដំណើរការឡើងវិញ តាំងពីពេលណាមកនោះទេ។
លោកបញ្ជាក់ថា សិប្បកម្មនេះបានសុំច្បាប់ដើម្បីចម្រាញ់ប្រេងខ្មៅ
ត្រឹមថ្នាក់ស្រុក ហើយស្រុកបានបញ្ជូនច្បាប់នេះទៅខេត្តបន្តទៀត
ប៉ុន្តែច្បាប់មិនទាន់ បានធ្លាក់ត្រឡប់មកវិញ ដើម្បីបញ្ជាក់ថា
អនុញ្ញាត ឬមិនអនុញ្ញាតនៅឡើយ ទេ
ដូច្នេះសិប្បកម្មមួយនេះមិនទាន់មានច្បាប់គ្រប់គ្រាន់ទេ ។
មន្ត្រីជំនាញបានឱ្យដឹងថា
ប្រេងដែលបានមកពីការចម្រាញ់ប្រេងខ្មៅយកមកប្រើប្រាស់វាធ្វើឱ្យ
គ្រឿងម៉ាស៊ីនគ្រប់ប្រភេទឆាប់ខូច
ព្រោះជាប្រេងមិនមានច្បាប់អនុញ្ញាតឱ្យប្រើប្រាស់ចាត់ទុកថា
ជាប្រេងខូចគុណភាព ដែលគេប្រើសម្រាប់តែដុតក្នុងរោងចក្រប៉ុណ្ណោះ ៕
ไม่มีความคิดเห็น:
แสดงความคิดเห็น