2011-06-19
ទេសចរបរទេសដែលមកទស្សនាប្រាសាទអង្គរវត្ត នៅខេត្តសៀមរាប កាលពីអំឡុងខែមេសា ឆ្នាំ២០១០
លោកបន្តថា ការធ្វើបែបនេះបានធ្វើឲ្យខាតប្រយោជន៍របស់ខ្មែរជាច្រើន ក្នុងការរកចំណូលពីចំហាយទេសចរណ៍ និងអាចធ្វើឲ្យការបកប្រែអំពីប្រវត្តិសាស្ត្រខ្មែរមិនបានគ្រប់ ជ្រុងជ្រោយ ឬអាចមានការភ័ន្តច្រឡំ ៖ «រឿង guide នេះ កម្ពុជាត្រូវទទួលផ្ដាច់មុខ រដ្ឋមន្ត្រីក្រសួងទេសចរណ៍ត្រូវទទួលខុសត្រូវ។ មិនអាចឲ្យនរណាគេមកកាន់កាប់អាហ្នឹងបានទេ ពីព្រោះអ្នកអាស័យសាស្ត្រមិនអាចយល់ មិនអាចស្គាល់វប្បធម៌របស់ជាតិបានច្បាស់លាស់ ប្រពៃណី ទំនៀមទម្លាប់ និងប្រវត្តិសាស្ត្ររបស់ជាតិបាននោះទេ។ វាមានតែកូនខ្មែរទេ ដែលរៀនប្រវត្តិសាស្ត្ររបស់ខ្លួនតាំងពីថ្នាក់បឋមសិក្សា មធ្យមសិក្សា រហូតដល់ថ្នាក់ឧត្ដមសិក្សា។ ទោះបីយើងមិនចេះភាសាដិតដល់ដូចគេក៏ដោយ ប៉ុន្តែទោះយ៉ាងណា ភាសាគ្រាន់តែជាការយាន្តអែបៗ នោះ តែសំខាន់បំផុត គឺប្រវត្តិយើងបានដឹង។ ហើយយកគេផ្សេងទៀតទោះបីគេចេះប្រវត្តិសាស្ត្រខ្លះក៏ដោយ ក៏គេមិននិយាយអស់ដែរ អាហ្នឹងគឺជាកំហុសមួយដែលក្រសួងទេសចរណ៍ត្រូវតែកែប្រែជា បន្ទាន់។»
ក្រៅពីមគ្គុទ្ទេសក៍ជនជាតិកូរ៉េ គេសង្កេតឃើញមានសណ្ឋាគាររបស់កូរ៉េ ភោជនីយដ្ឋានរបស់កូរ៉េ កន្លែងលក់វត្ថុអនុស្សាវរីយ៍របស់កូរ៉េ កន្លែងម៉ាស្សារបស់កូរ៉េ និងយន្តហោះរបស់កូរ៉េផងដែរ។ ដូច្នេះចាប់ពីពេលធ្វើដំណើរចេញពីប្រទេសកូរ៉េ មកដល់កម្ពុជា គេសង្កេតឃើញកូរ៉េបានផ្ដល់ប្រយោជន៍ទេសចរណ៍តិចតួចបំផុតដល់ពលរដ្ឋ ខ្មែរ។ ហើយប្រយោជន៍មួយចំនួនដែលខ្មែរទទួលបាន ភាគច្រើនបានពីកម្រៃផ្ដល់ទិដ្ឋាការ និងការទិញសំបុត្រចូលទស្សនាប្រាសាទអង្គរប៉ុណ្ណោះពីភ្ញៀវទេសចរណ៍ កូរ៉េ។ បញ្ហានេះគេក៏សង្កេតឃើញផងដែរថា មិនមែនត្រឹមតែមានការកេងចំណេញផ្នែកទេសចរណ៍ពីខាងជនជាតិកូរ៉េ ប៉ុណ្ណោះទេ ប៉ុន្តែក៏មានជនជាតិឯទៀត ដូចជាជប៉ុនជាដើម ក៏បានធ្វើរបៀបប្រហាក់ប្រហែលគ្នានេះដែរ។
លោក ជៀម យាម មានប្រសាសន៍បន្តថា កម្ពុជាហាក់ចាញ់ប្រៀបកូរ៉េទាំងស្រុង ក្នុងការរកស៊ីលើវិស័យទេសចរណ៍នេះ ៖ « ចំណែកកូរ៉េ យើងខាតស្ទើរទាំងស្រុង ដោយសារតែកប៉ាល់ហោះរបស់គេ យើងមានតែឡានទេ បានតែពេលចេញពីសៀមរាប មកអូតែលអីប៉ុណ្ណឹងទេ ហើយពីអូតែលទៅមើលប្រាសាទអីអ៊ីចឹងទៅ ជួនកាលឡានរបស់គេថែមទៀតក៏មានដែរ។ អ៊ីចឹងបានថាឲ្យក្រសួងទេសចរណ៍ត្រូវពិនិត្យពិចារណាសាឡើងវិញ។ អារឿងការងារអស់ទាំងហ្នឹង យើងត្រូវតែទទួលបានចំណេញមួយផ្នែក កុំឲ្យគេចំណេញទាំងស្រុង វាមិនកើតទេ។»
វិទ្យុអាស៊ីសេរីនៅមិនអាចសុំសេចក្ដីអត្ថាធិប្បាយពីលោក ថោង ខុន រដ្ឋមន្ត្រីក្រសួងទេសចរណ៍របស់កម្ពុជាបានទេ កាលពីថ្ងៃសុក្រ ទាក់ទិននឹងការព្រមានរបស់លោក ជៀម យាប តំណាងរាស្ត្រគណបក្សកាន់អំណាច។ ប៉ុន្តែលោក ថោង ខុន ធ្លាប់មានប្រសាសន៍ប្រាប់វិទ្យុអាស៊ីសេរីតាមទូរស័ព្ទកាលពីដើមខែ មិថុនាថា ការលើកឡើងអំពីបញ្ហាទេសចរណ៍កូរ៉េ គ្រាន់តែជាការវាយតម្លៃចំណុចមួយជ្រុងប៉ុណ្ណោះ តែទោះបីជាយ៉ាងក៏ដោយ វាបានជួយដល់កម្ពុជាច្រើនលើវិស័យវិនិយោគទុន និងពាណិជ្ជកម្មផ្សេងៗ ជាច្រើនទៀត ៖ «វាគ្រាន់តែទស្សនៈមួយជ្រុងទេ មើលឃើញតែមួយជ្រុងទេ តែសំខាន់វាមានការចំណេញច្រើន ពេលដែលយើងកំពុងមានការអភិវឌ្ឍហ្នឹង គឺត្រូវការឲ្យមានការធ្វើវិនិយោគទុន។ ហើយការវិនិយោគទុននេះ វាអាចជួយឲ្យស្រុកទេសអាចមានការអភិវឌ្ឍច្រើនណាស់។ ជាបន្តើរៗ ទៅយើងមានក្រុមហ៊ុនអាកាសចរណ៍របស់យើងហើយ។ ហើយចំពោះភោជនីយដ្ឋានវិញ កាលណាយើងមានទស្សនៈមកពីកូរ៉េ ជិះតែរបស់កូរ៉េ ស៊ីតែរបស់កូរ៉េអ៊ីចឹង អាហ្នឹងយើងខំធ្វើរបស់យើងឲ្យឆ្ងាញ់ទៅ វាជាកេរ្តិ៍ឈ្មោះរបស់យើងដែរតើ។ សំខាន់ពេលកូរ៉េមកគេមិនមែនហូបតែរបស់កូរ៉េឯណា តែពួកគេក៏ហូបរបស់ខ្មែរដែរតើ។ ការវិភាគអ៊ីចឹងវាមិនគ្រប់ជ្រុងជ្រោយនោះទេ។»
ប៉ុន្តែលោក ជៀម យាប បានជំទាស់យ៉ាងខ្លាំងទៅនឹងការលើកឡើងរបស់លោក ថោង ខុន ថាជាការដោះស្រាយយករួចខ្លួនប៉ុណ្ណោះ ហើយលោកមិនអាចទទួលយកបានទេ ចំពោះសេចក្ដីអត្ថាធិប្បាយរបស់លោករដ្ឋមន្ត្រីនោះ ៖ «ប្រសាសន៍ របស់ឯកឧត្ដមរដ្ឋមន្ត្រី គឺជាការទទួលខុស ហើយនឹងត្រូវ មិនមែនជាការឆ្លើយយករួចខ្លួនរបៀបហ្នឹងនោះមែនទេ។ នរណាក៏ចេះឆ្លើយអ៊ីចឹងដែរ ប៉ុន្តែមិនត្រូវធ្វើអ៊ីចឹងទេ។ យើងចាំបាច់ធ្វើយ៉ាងម៉េចត្រូវគៀងគរទោះបីម្ហូបយើងមិនឆ្ងាញ់ក៏ ដោយ ក៏ចាំបាច់បង្ខំឲ្យគេទទួលទានម្ហូបរបស់ជាតិយើងដែរ។ ម្ហូបរបស់យើងមិនមែនថាមិនឆ្ងាញ់ទាំងអស់នោះទេ ក៏មានអាមុខគេឆ្ងាញ់ គេត្រូវការ មុខគេចង់សាកល្បងអីអ៊ីចឹងដែរ។ អាហ្នឹងខ្ញុំមិនធ្វើការពិចារណានោះទេ បើសិនជាឆ្លើយអ៊ីចឹងនោះគឺអត់ទេ។ ខ្ញុំសូមជម្រាបអញ្ចេះថា យើងជាអ្នកទទួលខុស និងត្រូវ វាមិនធម្មតានោះទេ។»
របាយការណ៍របស់រដ្ឋសភាកម្ពុជាបង្ហាញថា ចំណូលថវិកាជាតិជារួមនៅរយៈពេល ៦ខែដើមឆ្នាំ២០១១ បានកើនឡើងដល់ទៅជាង ១ពាន់លានដុល្លារ ពីគ្រប់វិស័យទាំងអស់ នេះបើប្រៀបធៀបទៅនឹងរយៈពេលដូចគ្នាកាលពីឆ្នាំ២០១០។ ចំណែករបាយការណ៍របស់ក្រសួងទេសចរណ៍បង្ហាញថា ចំនួនភ្ញៀវទេសចរអន្តរជាតិមកកម្ពុជា នៅរយៈពេលបួនខែដំបូងក្នុងឆ្នាំ២០១១ មានចំនួន ១លាន ១ម៉ឺននាក់។
ទោះបីជាមានភ្ញៀវទេសចរណ៍ដ៏ច្រើនកើនឡើងពីមួយឆ្នាំទៅមួយ ឆ្នាំឥតឈប់យ៉ាងនេះក្តី ក៏គេសង្កេតឃើញពលរដ្ឋខ្មែរដែលរស់នៅក្នុងតំបន់ទេសចរណ៍ ជាពិសេសក្នុងខេត្តសៀមរាបនៅតែមានជីវភាពក្រតោកយ៉ាកដដែល ចាប់តាំងពីអ្នកនាំភ្ញៀវ រហូតដល់អ្នកលក់ដូរវត្ថុអនុស្សាវរីយ៍នៅទីនោះ។
មគ្គុទ្ទេសក៍ខាងភាសាកូរ៉េម្នាក់ លោក តាន់ ប៊ុនវ័ន បានអំពាវនាវដល់ក្រសួងទេសចរណ៍ឲ្យដោះស្រាយបញ្ហាមគ្គុទ្ទេសក៍ទេសចរណ៍ ជនជាតិកូរ៉េ ដែលកំពុងដណ្ដើមការងាររបស់ខ្មែរ និងកំពុងមើលងាយច្រាសឆ្អេះដល់ក្រុមអ្នកនាំភ្ញៀវខ្មែរ ថាជាពួក Guide ទីងមោង ឬជា Guide សម្រាប់នាំភ្ញៀវទៅបង្គន់ប៉ុណ្ណោះ។ ទន្ទឹមនឹងនេះ លោកក៏មានការព្រួយបារម្ភយ៉ាងខ្លាំងចំពោះការពន្យល់ខុសអំពី ប្រវត្តិសាស្ត្ររបស់ខ្មែរផងដែរ ៖ «ក្រសួងទេសចរណ៍គួរគិតគូដោះ ស្រាយបញ្ហានេះ ទីមួយដោះស្រាយ guide ជនជាតិកូរ៉េ យើងមិនត្រូវឲ្យអ្នកទាំងនោះធ្វើដូច្នេះទេ។ ប៉ុន្តែប្រសិនបើឲ្យ guide ជនជាតិកូរ៉េ សូមឲ្យយក guide របស់យើងជាអ្នកពន្យល់ ហើយចាំឲ្យ guide ជនជាតិកូរ៉េជាអ្នកពន្យល់ជា ភាសាកូរ៉េទៅភ្ញៀវ ទើបប្រវត្តិយើង ហើយជនជាតិខ្មែរយើងមានតម្លៃ។ ដូចរាល់ថ្ងៃខ្ញុំគិតថា ជនជាតិខ្មែរយើងអន់មែនទែន រហូតដល់វាប្រើពាក្យថា guide ទីងមោង និងជា guide សម្រាប់នាំភ្ញៀវទៅបង្គន់មួយម៉ាត់ហ្នឹង ខ្ញុំឈឺចាប់ណាស់។»
លោកថ្លែងបន្តថា រាល់តម្លៃទំនិញ តាំងពីតម្លៃធ្វើសរសៃ ទឹកសុទ្ធ រហូតដល់តម្លៃលក់វត្ថុអនុស្សាវរីយ៍ គឺក្រុម Guide ជនជាតិកូរ៉េ ជាអ្នកកំណត់តម្លៃទាំងអស់ ដូច្នេះ Guide របស់ខ្មែរគ្មានសិទ្ធិនិយាយ ហើយចាំតែទទួលកម្រៃ ២០ដុល្លារ ក្នុង ១ថ្ងៃប៉ុណ្ណោះ។
មគ្គុទ្ទេសក៍ទេសចរណ៍ខ្មែរម្នាក់ទៀត លោក ប្រឹម ប្រីយ មានប្រសាសន៍ថា ពលរដ្ឋខ្មែរដែលរស់នៅឆ្ងាយពីតំបន់ប្រាសាទមិនសូវមានចំណូល ចិញ្ចឹមគ្រួសារបានទេ ពីវិស័យទេសចរណ៍ ហើយបញ្ហានេះលោកថា រដ្ឋាភិបាលគួរមានវិធីសាស្ត្រយ៉ាងណា ដើម្បីឲ្យចំហាយទេសចរណ៍អាចហូរទៅដល់តំបន់ដាច់ស្រយាល ៖ «ភាគតិច ដែលបងប្អូនខ្មែរយើងលក់វត្ថុអនុស្សាវរីយតាមជុំវិញប្រាសាទ តាមអីហ្នឹង មិនសូវជាច្រើនប៉ុន្មានដែរហ្នឹង។ រកចំណូលបានតែអ្នកនៅជុំវិញប្រាសាទ នៅជិតៗ ទីរួមខេត្តហ្នឹង ហើយអ្នកនៅឆ្ងាយៗ មានដែលបានទទួលអីណា។»
ចំណែកអ្នកស្រី ជុំ រដ្ឋា អាយុ៦០ឆ្នាំ ដែលជាអ្នកលក់ដូរវត្ថុអនុស្សាវរីយ មានអាវយឺត ក្រមា កម្រាលតុ និងវត្ថុផ្សេងៗ ជាច្រើនទៀត បានត្អូញត្អែរថា ការរកស៊ីរបស់អ្នកស្រីសព្វថ្ងៃមិនសូវបានកាក់កបនោះទេ ជាមួយភ្ញៀវកូរ៉េ ពីព្រោះក្រុម Guide របស់កូរ៉េ តែងបង្វែរភ្ញៀវឲ្យទៅទិញវត្ថុអនុស្សាវរីយ៍នៅតាមសណ្ឋាគារដែលពួក គេកំពុងស្នាក់នោះវិញ ៖ «បើពួក tour guide វាឲ្យទិញអាហ្នឹងស្រួល ប៉ុន្តែពួកនោះច្រើនអត់ឲ្យទិញ ទោះត្រូវថ្លៃយ៉ាងណាក៏ដោយ ជួនណារើសរបស់យើងហើយ ក៏វាហៅអ្នកទាំងនោះឲ្យវិញដែរ ហើយពួកនោះទៅវឹង។ វាហៅទាំងអស់ថា មិនបាញ់ទិញទេ ទៅទិញនៅអូតែល ខ្ញុំជជែកជាមួយតើខ្ញុំខឹង ខ្ញុំជជែកជាមួយ។ ហើយខ្ញុំអត់លក់ថ្លៃទេ ខ្ញុំលក់ថោក តម្លៃសមរម្យ ហើយដល់អ៊ីចឹងទៅ ក៏វាហៅថាឲ្យទៅទិញនៅអូតែល ខ្ញុំក៏ស្រែក ខ្ញុំថាអ្នកឯងទៅទិញនៅអូតែលតម្លៃលើសពីរបស់ខ្ញុំដល់ទៅបី ឬបួនដងឯណោះ។ ដូចថាអត់ជឿជាក់សោះកូរ៉េ វាអត់ពិតប្រាកដសោះ។»
ជុំវិញវិស័យទេសចរណ៍នេះដែរ រដ្ឋសភារបស់កម្ពុជាគ្រោងនឹងលើកយកបញ្ហានេះមកពិភាក្សានាចុងខែ មិថុនាខាងមុខ ដើម្បីសួរដេញដោល និងស្វែងរកលទ្ធភាពផ្សេងៗ ដើម្បីកែលម្អវិស័យទេសចរណ៍របស់កម្ពុជាឲ្យបានប្រសើរថែមទៀត៕
ไม่มีความคิดเห็น:
แสดงความคิดเห็น