សុវណ្ណវតី: ស្រ្តីម្នាក់ត្រូវរន្ទះបាញ់ស្លាប់ទុកឪ្យកូនប្រុសអាយុ 4 ឆ្នាំកំព្រា

(ប្រុសកោះ)

ថ្ងៃព្រហស្បត្ត៏ ទី១៤ ខែកក្កដា ឆ្នាំ២០១១ ម៉ោង ១១:១០

កោះសន្តិភាព

សពស្រ្តីដែលត្រូវរន្ទះបាញ់ស្លាប់

ខេត្តស្វាយរៀង ៖ ស្ត្រីម្នាក់បានត្រូវត្រូវរន្ទះបាញ់ស្លាប់ភ្លាមៗនៅនឹងកន្លែង និងស្ត្រីម្នាក់ទៀតជាម្តាយមីងសន្លប់ស្តូកស្តឹងពេលរត់ទៅដល់ ផ្ទះ ធ្វើឱ្យអ្នកភូមិមានការភ្ញាក់ផ្អើល និងភ័យខ្លាចយ៉ាងខ្លាំង ។ ករណីរន្ទះបាញ់នេះបានកើតឡើងកាលពីថ្ងៃទី១៣ កក្កដា ឆ្នាំ២០១១ វេលាម៉ោង២និង១៥នាទីរសៀល នៅភូមិនារាទេន ឃុំឈើទាល ស្រុកស្វាយជ្រំ ។

ស្ត្រីដែលស្លាប់ឈ្មោះនាង សុភី អាយុ២៩ឆ្នាំ ឯម្តាយមីងដែលសន្លប់ឈ្មោះរស់ សារិន អាយុ៥០ឆ្នាំ រស់នៅក្នុងភូមិខាងលើជាមួយគ្នា ។ អ្នកស្រីរស់ ផល្លា អាយុ៥៦ឆ្នាំ ជាម្តាយស្ត្រីដែលស្លាប់បានរៀបរាប់ថា នៅមុនពេលកើតហេតុ កូនស្រីរបស់គាត់នាង សុភី បានទៅផ្លាស់គោដែលចងឱ្យស៊ីស្មៅនៅវាលស្រែខាងត្បូងផ្ទះ ចម្ងាយជាង២០០ម៉ែត្រ រួចក៏ត្រឡប់មកវិញ មកឈរមើលម្តាយមីងឈ្មោះរស់ សារិន ដែលកំពុងឈរមើលម៉ាស៊ីនបូមទឹកចេញពីស្រែ ដើម្បីព្រោះស្រូវ និងចាំមើលពេលទឹកក្នុងស្រែរីងនឹងចុះចាប់ត្រី ដើម្បីយកមកធ្វើម្ហូបពេលបាយល្ងាច។ ពេលនោះស្រាប់តែមេឃមានដុំពពកខ្មៅពីទិសខាងលិច និងមានផ្លេកបន្ទោរភ្លែតៗ ហើយរន្ទះក៏បាញ់លាន់កក្រើកចំកូនស្រីគាត់ដួលផ្កាប់មុខស ង្កត់ទៅលើម្តាយមីងរស់ សារិន និងដួលទាំងពីរនាក់ចូលទៅក្នុងទឹក ។ បន្ទាប់មកម្តាយមីងក៏ក្រោកឡើងរួចលើកក្មួយស្រីដាក់លើភ្លឺស្រែ ពេលនោះក៏មានផ្លេកបន្ទោរទៀត ទើបទម្លាក់ក្មួយស្រីទៅលើដីរួចក្រោករត់ទាំងភ័យតក់ស្លុតក្រោម ស្នូររន្ទះមួយគ្រាប់ទៀត ធ្វើឱ្យម្តាយមីងរត់ដួលៗ លុះទៅដល់ផ្ទះក៏សន្លប់តែម្តង ។

ស្ត្រីជាម្តាយរៀបរាប់ទៀតថា ក្រោយពីនាំគ្នាធ្វើចលនាសង្គ្រោះមួយសន្ទុះធំ ទើបម្តាយមីងបានដឹងខ្លួនក៏ប្រាប់ថា កូនស្រីគាត់នាង សុភី ត្រូវរន្ទះបាញ់នៅលើភ្លឺស្រែ រួចក៏និយាយលែងដឹងខុសត្រូវដោយសារការភ័យខ្លាច រហូតលូនចូលក្នុងភួយមិនហ៊ានមើលគេឯងសំងំទាំងខ្លួនញ័រចំប្រប់។ ចំណែកអ្នកស្រុកពេលបានដឹងថា រន្ទះបាញ់កូនស្រីគាត់នាង សុភី ក៏នាំគ្នារត់ទៅមើលឃើញនាងឆេះមុខមួយចំហៀង និងស្លាប់បាត់បង់ជីវិតទៅហើយ ក៏នាំគ្នាសែងមកផ្ទះ ខណៈភ្លៀងចាប់ផ្តើមធ្លាក់លាយឡំនឹងខ្យល់ផ្គររន្ទះលាន់គ្រហឹម គួរឱ្យព្រឺខ្លាចក្រែលែង ។

អ្នកស្រីរស់ ផល្លា បាននិយាយរៀបរាប់ទាំងទឹកភ្នែកថា គ្រួសាររបស់គាត់អភ័ព្វណាស់ប្តីរបស់គាត់ឈ្មោះគឹម សំអឿន ត្រូវរន្ទះបាញ់ស្លាប់ កាលពីឆ្នាំ១៩៨៧ បន្សល់ទុកកូនចំនួន៦នាក់ (ស្រី២នាក់) ទុកឱ្យរូបគាត់ចិញ្ចឹមយ៉ាងវេទនាបំផុត ហើយពេលនេះកូនៗបានចាកចេញចោលរូបគាត់អស់ហើយ ។ សព្វថ្ងៃគាត់រស់នៅតែជាមួយកូនស្រី និងចៅប្រុសអាយុ៤ឆ្នាំ ដោយកូនប្រសាឈ្មោះឡុង ធារ៉ាត់ អាយុ៣០ឆ្នាំ ទៅរកសីុនៅប្រទេសថៃបាត់ជាងមួយឆ្នាំហើយមិនឃើញមកវិញទេ ៕

ទំព័រមុន

ស្រ្តីម្នាក់ត្រូវរន្ទះបាញ់ស្លាប់ទុកឪ្យកូនប្រុសអាយុ 4 ឆ្នាំកំព្រា

ไม่มีความคิดเห็น:

แสดงความคิดเห็น