ថ្ងៃអង្គារ ទី១២ ខែកក្កដា ឆ្នាំ២០១១ ម៉ោង ០៩:១២
កោះសន្តិភាព
សម្តេចតេជោ និងលោកជំទាវប្រគល់ទង់ដល់អភិបាលខេត្តមានឆ្នេរសមុទ្រ
ខេត្តព្រះសីហនុ ៖
សម្តេចអគ្គមហាសេនាបតីតេជោ ហ៊ុន សែន
នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា
ការចូលជាសមាសជិកក្លឹបលំដាប់ពិភពលោក
គឺជាព្រឹត្តិការណ៍ប្រវត្តិសាស្ត្រថ្មីមួយទៀត សម្រាប់កម្ពុជា
ដែលនឹងផ្តល់កាលានុវត្តដ៏ធំធេងបន្ថែមទៀត
ក្នុងការចូលរួមចំណែកជំរុញការអភិវឌ្ឍតំបន់ឆ្នេរសមុទ្រកម្ពុជា
ឱ្យស្ទុះងើបឡើង ស្របតាមរហស្សនាមជាតំបន់ក្បាលនាគនៃកម្ពុជា ។
សម្តេចតេជោនាយករដ្ឋមន្ត្រី ហ៊ុន សែន
មានប្រសាសន៍បែបនេះនារសៀលថ្ងៃទី១១ កក្កដា
ឆ្នាំ២០១១នៅសណ្ឋាគារឯករាជ្យ (អតីតសណ្ឋាគារ៧ជាន់)
ក្នុងឱកាសដែលសម្តេច
និងលោកជំទាវកិត្តិព្រឹទ្ធបណ្ឌិតអញ្ជើញជាអធិបតីក្នុងពិធីអប
អរសាទរការដាក់បញ្ចូលឆ្នេរសមុទ្រកម្ពុជា
ជាសមាជិកក្លឹបឆ្នេរសមុទ្រដែលស្អាតបំផុត លើសាកលលោក
និងផ្សព្វផ្សាយផែនការសកម្មភាពអនុវត្តបន្ត ។
សម្តេចតេជោនាយករដ្ឋមន្ត្រីមានប្រសាសន៍បន្តថា
សមាជិកភាពនេះបានប្រសូតឡើងស្របតាមសុច្ឆន្ទៈរបស់ប្រជាជន
កម្ពុជា និងជាលក្ខខណ្ឌចាំបាច់បំផុត
សម្រាប់ធានាបាននូវប្រសិទ្ធភាព
និងភាពស័ក្តិសិទ្ធិលើការប្រើប្រាស់សក្តានុពលនៃធនធានឱ្យ
ប្រកបដោយចីរភាពក្នុងការទ្រទ្រង់ដល់កំណើនសេដ្ឋកិច្ច
និងការកាត់បន្ថយភាពក្រីក្រតាមរយៈការជំរុញវិស័យទេសចរណ៍
ដែលនឹងអូសទាញដល់ការរីកចម្រើនលូនលាស់ផ្នែកសណ្ឋាគារ
ភោជនីយដ្ឋាន ការដឹកជញ្ជូន និងសេវាផ្សេងៗទៀត ។
ការងារចូលជាសមាជិកក្លឹបនេះ
ពិតជាបានស្តែងឱ្យឃើញពីរបត់ថ្មីនៃការប្រែប្រួលមុខមាត់ជា
បន្តបន្ទាប់របស់តំបន់សមុទ្រកម្ពុជា
ទាំងលើទិដ្ឋភាពនៃផ្នែកសង្គម សេដ្ឋកិច្ច ទេសចរណ៍
នគរូបនីយកម្ម និងបរិស្ថាន
ដែលជាកត្តាកំណត់លើការទទួលស្គាល់ជាអន្តរជាតិនៃឆ្នេរសមុទ្រ
ទាំងមូលប្រវែង៤៤០គីឡូម៉ែត្រ
គ្របដណ្តប់លើខេត្តទាំង៤របស់កម្ពុជា រួមមានខេត្តព្រះសីហនុ
ខេត្តកោះកុង ខេត្តកំពត និងខេត្តកែប ក្រោមឈ្មោះរួមមួយថា
«ឆ្នេរសមុទ្រកម្ពុជា» ។
ដើម្បីជំរុញដំណើរការគ្រប់គ្រងទិសអភិ វឌ្ឍឆេ្នរសមុទ្រកម្ពុជា ប្រកបដោយចីរភាពប្រសិទ្ធភាព ទទួលខុសត្រូវខ្ពស់ឱ្យបានល្អស្អាតស័ក្តិសមជាសមាជិកនៃក្លឹប ឆ្នេរសមុទ្រដែលស្អាតបំផុត លើសាកលលោកនេះសម្តេចតេជោនាយករដ្ឋមន្ត្រី ដាក់ចេញអនុសាសន៍មួយចំនួនដូចតទៅ ៖
១-គណៈកម្មការអន្តរក្រសួងត្រូវជំរុញរៀបចំ
បង្កើតគណៈកម្មាធិការជាតិអភិវឌ្ឍន៍
និងគ្រប់គ្រងឆ្នេរសមុទ្រកម្ពុជា ឱ្យបានឆាប់រហ័ស
ដើម្បីជាយន្តការរួមមួយក្នុងការគ្រប់គ្រងការអភិវឌ្ឍ
និងការអភិរក្សឆ្នេរសមុទ្រកម្ពុជា ដោយគ្របដណ្តប់លើទិដ្ឋភាព
រួមទាំងផ្នែកនគរូបនីយកម្ម បរិស្ថាន និងទេសចរណ៍
សំដៅធានាឱ្យបាននូវទស្សនាទាន
«ការអភិរក្សបម្រើដល់ការអភិវឌ្ឍខណៈដែលការអភិវឌ្ឍទ្រទ្រង់ដល
កិច្ចអភិរក្ស»។
២-ត្រូវបន្តរៀបចំឱ្យមានឆ្នេរគំរូមួយ
ដោយជ្រើសរើសយកឆ្នេរសមុទ្រអូរត្រេះ
សម្រាប់ការអនុវត្តជំហានដំបូងធ្វើជាគំរូដល់ការរៀបចំនៅ
ឆ្នេរដទៃទៀត
និងឈានទៅដល់ការកសាងលិខិតបទដ្ឋានគតិយុត្តចាំបាច់នានា ។
៣-ក្រសួងរៀបចំដែនដីនគរូនីយកម្ម
និងសំណង់ត្រូវសហការជាមួយក្រសួងស្ថាប័ន
និងអាជ្ញាធរពាក់ព័ន្ធរៀបចំក្របខណ្ឌគតិយុត្ត
និងចំពោះមុខត្រូវរៀបចំនូវសារាចររបស់រាជរដ្ឋាភិបាលស្តីពី
គោលការណ៍ណែនាំអភិវឌ្ឍឆ្នេរសមុទ្រកម្ពុជាជាបន្ទាន់មួយ
ច្បាស់លាស់ ដោយរក្សាឱ្យបានផ្ទៃសមុទ្រឆ្នេរខ្សាច់ ចំណីឆ្នេរ
ទាំងនៅជាប់ដីគោក ដីកោះ និងផ្លូវទឹក ។
៤-ក្រសួងទេសចរណ៍ត្រូវសហការជាមួយក្រសួង
ស្ថាប័ន និងអាជ្ញាធរពាក់ព័ន្ធរៀបចំ
ជាបទដ្ឋានគតិយុត្តចាំបាច់មួយចំនួនដូចជាផែនការអភិវឌ្ឍទេស
ចរណ៍តំបន់ អេក្ខឡាបែលឆ្នេរសមុទ្រ
ដើម្បីធានាឱ្យសកម្មភាពទេសចរណ៍នៅតាមបណ្តោយឆ្នេរសមុទ្រគោរពតាម
បទដ្ឋានបរិស្ថាន ។
៥-អាជ្ញាធរខេត្តតំបន់ឆ្នេរត្រូវយកចិត្តទុក
ដាក់ជំរុញអនុវត្តសេចក្តីសម្រេចរបស់រាជរដ្ឋាភិបាលស្តីពីការ
បង្កើតក្រុមឆ្មាំឆ្នេរសមុទ្រឱ្យបានឆាប់
ព្រមទាំងត្រូវបំពាក់សម្ភារឧបករណ៍ចាំបាច់នានា
និងកូនឆ្មាំឆ្នេរសមុទ្រសំខាន់ៗ
និងឈានទៅការដាក់ឱ្យជំនាញការងាររបស់ក្រុមឆ្នាំឆ្នេរ
សមុទ្រ ។
៦-ក្រសួងស្ថាប័នពាក់ព័ន្ធនឹងការងារគ្រប់
គ្រងតំបន់ឆ្នេរត្រូវពិនិតិ្យឡើងវិញ
នូវរាល់សកម្មភាពទាំងឡាយណាដែលពាក់ព័ន្ធ
នឹងធនធានក្រោមទឹកសមុទ្រ
ដូចជាការបូមខ្សាច់មិនគោរពតាមបទដ្ឋានត្រឹមត្រូវ ។
៧-អាជ្ញាធរខេត្តត្រូវបន្តពង្រឹងសមត្ថភាព
មន្ត្រីអាជ្ញាធរមូលដ្ឋាន និងមន្ត្រីពាក់ព័ន្ធក្នុងការអភិវឌ្ឍ
និងអភិរក្សតំបន់ឆ្នេរ។
៨-អាជ្ញាធរមូលដ្ឋានត្រូវមានស្មារតីប្រុង
ប្រយ័ត្នចំពោះការអភិវឌ្ឍតំបន់ឆ្នេរឱ្យប្រកបដោយចីរភាព
និងការទទួលខុសត្រូវដោយផ្សារភ្ជាប់នឹងយុទ្ធនាការផ្សព្វ
ផ្សាយទេសចរណ៍«កម្ពុជាព្រះរាជាណាចក្រអច្ឆរិយ»
«ទីក្រុងស្អាតរមណីដ្ឋានស្អាត សេវាល្អ»។
លោកអ៊ឹម ឈុនលឹម
ទេសរដ្ឋមន្ត្រី-រដ្ឋមន្ត្រីក្រសួងរៀបចំដែនដី នគរូបនីយកម្មសំណង់
និងជាប្រធានគណៈកម្មាធិការអន្តរក្រសួងបានមានប្រសាសន៍ថា
ឆ្នេរសមុទ្រកម្ពុជាត្រូវបានទទួលស្គាល់ជាសមាជិកពេញសិទ្ធិរបស់
ក្លឹបឆ្នេរសមុទ្រដែលស្អាតបំផុតលើសកលលោក
ក្នុងឱកាសមហាសន្និបាតលើកទី៧របស់ក្លឹប កាលពីថ្ងៃទី២៥ ឧសភា
ឆ្នាំ២០១១ នៅសាធារណរដ្ឋសេណេហ្គាល់។
លោកទេសរដ្ឋមន្ត្រីមានប្រសាសន៍ថា
ការទទួលស្គាល់ និងការដាក់បញ្ចូលឆ្នេរសមុទ្រកម្ពុជាទាំងមូល
ដែលលាតសន្ធឹងលើផ្ទៃដីប្រមាណ៤៤០គីឡូម៉ែត្រ
ដោយគ្របដណ្តប់លើខេត្តតំបន់ឆ្នេរទាំង៤
គឺជាការគាំទ្រជាប្រវត្តិសាស្ត្រសម្រាប់ព្រះរាជាណាចក្រក
ម្ពុជា។
ជាការពិត
ការជាប់ជាសមាជិកនេះបានឆ្លុះបញ្ចាំងយ៉ាងប្រត្យក្សពីការទទួល
ស្គាល់នូវលក្ខណៈពិសេសនៃឆ្នេរសមុទ្រកម្ពុជាទាំងកម្រិតថ្នាក់ជាតិ
និងកម្រិតថ្នាក់អន្តរជាតិ៕
ไม่มีความคิดเห็น:
แสดงความคิดเห็น