ដោយ សុខ សេរី
2011-07-06
លោកនាយករដ្ឋមន្ត្រី ហ៊ុន សែន នៅថ្ងៃទី ៦ ខែកក្កដា ឆ្នាំ ២០១១ បានរិះគន់គណបក្សប្រឆាំង សម រង្ស៊ី ថាបានឆ្លៀតឱកាសរៀបចំពិធីរំលឹកវិញ្ញាណក្ខន្ធដល់អ្នកស្លាប់ នៅក្នុងរដ្ឋប្រហារ នៅថ្ងៃទី ៥ និងថ្ងៃទី ៦ ខែកក្កដា ឆ្នាំ ១៩៩៧ នៅក្នុងទីក្រុងភ្នំពេញ ដើម្បីយកចំណេញនយោបាយ។លោកនាយករដ្ឋមន្ត្រី ហ៊ុន សែន មានប្រសាសន៍ ដោយងាកមុខសម្លឹងទៅលោក ញឹក ប៊ុនឆៃ ដែលនៅអង្គុយនៅលើវេទិកាថា ៖ «ញឹក ប៊ុនឆៃ អត់ធ្វើបុណ្យផង។ ថ្ងៃនេះ ថ្ងៃវាយគ្នាចុងក្រោយ។ ពេលហ្នឹង ញឹក ប៊ុនឆៃ កំពុងតែសម្រុកចូលក្រុងហើយ ថ្ងៃហ្នឹង ម៉ោងហ្នឹង។ កែ គឹមយ៉ាន ទៀ បាញ់ សាយ ឈុំ សុខ អាន មកនៅជាមួយខ្ញុំនៅឯណេះ។ ពេលហ្នឹងកំពុងតែសម្រុកចូលក្នុង មិនអ៊ីចឹង? ថ្ងៃនោះ ម៉ោងហ្នឹង ឆ្នាំនោះ កំពុងតែសម្រុកចូលក្រុង។ កំពុងតែដាក់គ្នានៅហ្នឹង។ រថក្រោះទៅពីនេះ ៣ ឆេះអស់ ២ ហើយ។ កាលហ្នឹង ឆៃ ឯងវាយថែមបន្តិចទៀត យកសាកលវិទ្យាល័យបាន គឺចប់»។
គណបក្សប្រឆាំង សម រង្ស៊ី បានប្រកាសថា ខ្លួនរៀបចំពិធីបង្សុកូល ដើម្បីគោរពវិញ្ញាណក្ខន្ធដល់ជនរងគ្រោះ ដែលបានបាត់បង់ជីវិត នៅក្នុងការធ្វើរដ្ឋប្រហារ ថ្ងៃទី ៥ និង ថ្ងៃទី ៦ ខែកក្កដា ឆ្នាំ ១៩៩៧ នៅឯទីស្នាក់ការធំគណបក្ស នៅក្នុងទីក្រុងភ្នំពេញ នៅថ្ងៃទី ៦ ខែកក្កដា ឆ្នាំ ២០១១។
នៅថ្ងៃនោះហើយ គឺមានកងទ័ពគាំទ្រនាយករដ្ឋមន្ត្រីទី១ គឺសម្ដេចក្រុមព្រះ នរោត្តម រណឫទ្ធិ និងកងទ័ពគាំទ្រនាយករដ្ឋមន្ត្រីទី២ គឺលោក ហ៊ុន សែន បានបើកការវាយប្រហារគ្នា។ ខាងគណបក្ស ហ៊្វុនស៊ិនប៉ិច បានចោទប្រកាន់ថា កងទ័ពគាំទ្រលោក ហ៊ុន សែន ធ្វើរដ្ឋប្រហារ ដើម្បីទម្លាក់សម្ដេចក្រុមព្រះ នរោត្តម រណឫទ្ធិ ចេញពីតំណែង។
រដ្ឋប្រហារនោះ បានផ្ទុះឡើងបន្ទាប់ពីសម្ដេចក្រុមព្រះ ប្រកាសធ្វើតុល្យភាពកម្លាំងទ័ពស្មោះត្រង់រវាងគណបក្សប្រជាជនកម្ពុជា និងគណបក្សហ៊្វុនស៊ិនប៉ិច។ នាយករដ្ឋមន្ត្រីទី២ លោក ហ៊ុន សែន បានចោទសម្ដេចក្រុមព្រះ នរោត្តម រណឫទ្ធិ ថា បាននាំចូលអាវុធខុសច្បាប់ និងនាំចូលកម្លាំងទ័ពខ្មែរក្រហមមកបង្កប់នៅក្រុងភ្នំពេញ៕
ไม่มีความคิดเห็น:
แสดงความคิดเห็น