អំពាវ​នាវ​ឱ្យ​មន្ត្រី​​សង្គម​កិច្ច​បញ្ឈប់​ការ​ទិញ​លក់​សៀវ​ភៅ​របប​គោល​នយោ​បាយ

​(ប្រុសកោះ)

ថ្ងៃសៅរ៏ ទី៩ ខែកក្កដា ឆ្នាំ២០១១ ម៉ោង ១៦:១០

ខេត្ត​ក្រចេះ​ ៖ មន្ទីរសង្គមកិច្ច អតីត​យុទ្ធជន​និងយុវនីតិសម្បទាខេត្តក្រចេះបានរៀបចំកិច្ច ប្រជុំ​ផ្សព្វផ្សាយជុំវិញអនុសាសន៍សម្តេចអគ្គ​មហា​សេនាបតីតេជោហ៊ុន សែន នាយករដ្ឋមន្រ្តីនៃព្រះ​រាជាណាចក្រកម្ពុជាស្តីពីការទិញលក់សៀវភៅ​ របបគោលនយោបាយរបស់អតីតយុទ្ធជននិង​គ្រួសារយោធិន​ពលី​ ។

កិច្ចប្រជុំនេះធ្វើឡើងនៅសាលប្រជុំមន្ទីរសង្គម កិច្ច អតីតយុទ្ធជន និងយុវនីតិសម្បទាខេត្តក្រចេះ  កាលពីព្រឹកថ្ងៃទី៤ កក្កដា ស្ថិតក្រោមអធិបតី​ភាព​លោក អ៊ុន ស៊ីដេត ប្រធានមន្ទីរ​សង្គមកិច្ច អតីត​យុទ្ធ​ជន និងយុវនីតិសម្បទាខេត្ត ។

បន្ទាប់ពីលោក ជ មានអាន អនុប្រធាន​មន្ទីរ​សង្គមកិច្ចបានអានសេចក្តីប្រកាសជូនដំណឹងលេខ ០៤១ស.អ.យ ចុះថ្ងៃទី២៧ ខែមិថុនា ឆ្នាំ ២០១១ របស់ក្រសួងសង្គមកិច្ច អតីតយុទ្ធជន និងយុវនីតិសម្បទាស្តីពីការអនុវត្តតាមអនុសាសន៍​របស់​ សម្តេចអគ្គមហាសេនាបតីតេជោ ហ៊ុន សែន រួច​មក លោកប្រធានមន្ទីរមាន​ប្រសាសន៍ថា កិច្ច​ប្រជុំ​នេះធ្វើឡើងក្នុងគោលបំណងផ្សព្វផ្សាយអនុ​សាសន៍​របស់​ សម្តេចអគ្គមហាសេនាបតីតេជោ ហ៊ុន សែន ដែល​ទាក់ទងដល់ផលប្រយោជន៍​របស់​អតីតយុទ្ធជន​និង​គ្រួសារគឺ​ឱ្យ​បញ្ឈប់ការទិញ​ លក់​សៀវភៅរបបគោលនយោបាយជាសាធារណៈ ជូនដល់មន្ត្រី របស់មន្ទីរសង្គមកិច្ចនិងបងប្អូនអតីត យុទ្ធជន និងគ្រួសារ។  លោកប្រធានមន្ទីរ​សង្កត់​ធ្ងន់ថាដរាបណានៅមានសម្តេចតេជោហ៊ុន សែន និងលោកជំទាវដរាបនោះបងប្អូនអតីតយុទ្ធជន​ និងគ្រួសារទាំងអស់ត្រូវបានយកចិត្តទុកដាក់គ្រប់ ពេលវេលាទៅលើជីវភាពរស់នៅ និងផ្តល់ជូន​របប​គោលនយោបាយជានិច្ច។

លោកប្រធានមន្ទីរបានសំណូមពរនិងអំពាវ នាវដល់អតីតយុទ្ធជននិងគ្រួសារទាំងអស់ឱ្យ​ជួយផ្សព្វផ្សាយបន្តដល់អតីតយុទ្ធជន និង​គ្រួសារណា ដែលជាប់ពាក់ពន្ធ័នឹងការទិញលក់​សៀវភៅគោលរបបរបស់​អតីតយុទ្ធជននិង​គ្រួសារ​ អតីតយុទ្ធជនគ្រប់ប្រភេទ ត្រូវប្រគល់​ជូនទៅម្ចាស់ដើមវិញដោយឥតលក្ខខណ្ឌ និងឥត​សំណង បើបុគ្គលណាមិនព្រម​ប្រគល់ជូន​ទេនោះ​ត្រូវរាយការណ៍មកមន្ទីរ​ជា​បន្ទាន់ដើម្បី ​មន្ទីរចាត់​វិធានការដើម្បី​ឆ្លើយ​តបទៅតាមអនុសាសន៍​របស់សម្តេចអគ្គមហាសេនា​​ បតី​​តេជោ ហ៊ុន សែន និងគោល​ការណ៍​ណែនាំផ្សេងៗរបស់​ក្រសួង ៕