ដោយ សុខ សេរី
2011-07-14
សាលាឧទ្ធរណ៍នៅកម្ពុជា ថ្ងៃទី១៤ ខែកក្កដា ឆ្នាំ២០១១ បានប្រកាសសាលដីកាបន្តឃុំខ្លួនបុគ្គលិករបស់អង្គការការពារសិទ្ធិ មនុស្សលីកាដូ (Licadho) លោក លាង សុខជឿន ជាបន្តទៀត ក្រោមបទចោទថា មានការពាក់ព័ន្ធនឹងការបាចខិត្តប័ណ្ណប្រឆាំងរដ្ឋាភិបាលកម្ពុជា នៅឆ្នាំ២០១០ កន្លងទៅ។
១៤-កក្កដា-២០១១៖ បុគ្គលិកអង្គការលីកាដូ លោក
លាង សុខជឿន
ផ្ដល់បទសម្ភាសន៍ដល់អ្នកកាសែតបន្ទាប់ពីការប្រកាសសាលដីកានៅ
សាលាឧទ្ធរណ៍ រាជធានីភ្នំពេញ។
ចៅក្រមជម្រះក្ដីនៃសាលាឧទ្ធរណ៍ លោក ប៉ុល សំអឿន បានអានសាលដីកាចំពោះមុខលោក លាង សុខជឿន ថា លោក លាង សុខជឿន មិនបានចូលរួមក្នុងការបាចខិត្តប័ណ្ណនៅក្នុងខេត្តតាកែវទេ ប៉ុន្តែលោក លាង សុខជឿន មានការពាក់ព័ន្ធជាមួយនឹងព្រះសង្ឃខ្មែរកម្ពុជាក្រោម ព្រះនាម ថាច់ កុងភួង ក្រោមបទញុះញង់បង្កអសន្តិសុខសង្គម។
បុគ្គលិកនៃអង្គការការពារសិទ្ធិមនុស្សលីកាដូ លោក លាង សុខជឿន ក្រោយពីការប្រកាសសាលដីកានោះ បានមានប្រសាសន៍ប្រាប់អ្នកកាសែតថា សាលដីកានេះអយុត្តិធម៌ណាស់។ លោកមិនបន្តប្ដឹងសាទុក្ខទៅតុលាការកំពូលទេ ដោយសារតែលោកគ្មានជំនឿ។
លោកបន្តថា ៖ «នៅក្នុងការចោទប្រកាន់នេះ ជនដែលត្រូវចោទឈ្មោះ លាង សុខលី អាយុ ៣១ឆ្នាំ ដែលជាជនជាតិវៀតណាម ហើយរស់នៅសង្កាត់ស្វាយប៉ាក ខណ្ឌឫស្សីកែវ និងមានមុខរបរមិនពិតប្រាកដ។ ចំណែកខ្ញុំ ឈ្មោះ លាង សុខជឿន អាយុ ២៨ឆ្នាំ ជាជនជាតិខ្មែររស់នៅខណ្ឌសែនសុខ សង្កាត់ខ្មួញ ក្រុងភ្នំពេញ និងមានមុខរបរជាបុគ្គលិកអង្គការលីកាដូ។ ចោទប្រកាន់នេះគឺជារឿងអយុត្តិធម៌បំផុតសម្រាប់ខ្ញុំ»។
ក្រុមឆ្មាំគុកបាននាំខ្លួនលោក លាង សុខជឿន ចូលក្នុងរថយន្តដឹកទៅបន្តឃុំខ្លួននៅក្នុងគុក ក្នុងក្រុងតាខ្មៅ ខេត្តកណ្ដាល។
ប្រធានក្រុមអ្នកស៊ើបអង្កេតនៃអង្គការការពារសិទ្ធិមនុស្សលីកាដូ លោក អំ សំអាត បានមានប្រសាសន៍ថា លោកមានការសោកស្ដាយចំពោះសាលដីកាបែបនេះ ៖ «ជឿន ធ្លាប់ស្គាល់ជាមួយនឹងលោក ថាច់ កុងភួង លោក ថាច់ វណ្ណៈ ដែលកាលនៅរៀនជាមួយគ្នានៅឆ្នាំ២០០៥ ហើយក្រោយមកនៅឆ្នាំ២០០៦ ក៏បែកគ្នា ប៉ុន្តែក្រោយមកទៀត ដោយសារតែបែកគ្នាយូរ ហើយនៅចុងឆ្នាំ២០០៩ ហ្នឹង ថាច់ កុងភួង បានមកស្រុកខ្មែរ ហើយបានទាក់ទងមក ជឿន។ គ្រាន់តែឌុបទៅវត្តឧណ្ណាលោម និងមុខស្ថានទូតបារាំង ហើយក៏បែកគ្នារហូតទៅ។ ក្រោយមកទៀត ជឿន អត់មានចូលរួមអីជាមួយទាំងអស់នោះទេ»។
លោក លាង សុខជឿន ត្រូវបាននគរបាលក្រសួងមហាផ្ទៃ បានចាប់ខ្លួននៅថ្ងៃទី២៩ ខែឧសភា ឆ្នាំ២០១០ កន្លងទៅ នៅខណ្ឌសែនសុខ រាជធានីភ្នំពេញ ដើម្បីសួរចម្លើយនៅឯក្រសួងមហាផ្ទៃ។ ក្រោយមកតុលាការសាលាដំបូងខេត្តតាកែវ បានកាត់ទោសនៅថ្ងៃទី៣០ ខែសីហា ឆ្នាំ២០១០ ឲ្យជាប់គុករយៈពេល ២ឆ្នាំ និងផាកពិន័យចំនួន ២លានរៀល ក្រោមបទផ្សាយព័ត៌មានមិនពិត និងបរិហារកេរ្តិ៍ ដោយសារតែអាជ្ញាធរនគរបាលបានចោទប្រកាន់ថា លោកមានការពាក់ព័ន្ធនឹងការបាចខិត្តប័ណ្ណប្រឆាំងរដ្ឋាភិបាលកម្ពុជា និងប្រឆាំងថ្ងៃ៧ មករា ឆ្នាំ១៩៧៩ ថាជាថ្ងៃយួនឈ្លានពានកម្ពុជា។
នៅក្នុងរឿងនេះដែរ តុលាការខេត្តតាកែវ បានកាត់ទោសកំបាំងមុខឲ្យព្រះសង្ឃខ្មែរកម្ពុជាក្រោម ព្រះនាម ថាច់ កុងភួង ជាប់គុកចំនួន ៣ឆ្នាំ និងផាកពិន័យចំនួន ៣លានរៀលជាមេខ្លោង។
ចំណែកឯព្រះសង្ឃខ្មែរកម្ពុជាក្រោមចំនួន ២អង្គទៀត គឺព្រះនាម ថាច់ ឡេ និង ថាច់ វណ្ណៈ ត្រូវបានកាត់ទោសឲ្យជាប់គុកម្នាក់ៗ ២ឆ្នាំ និងផាកពិន័យម្នាក់ៗ ២លានរៀល៕
ไม่มีความคิดเห็น:
แสดงความคิดเห็น