ដោយ គឹម ពៅ
2011-06-09
ព្រឹត្តិបត្ររបស់ធនាគារពិភពលោកប្រចាំខែមេសា បានអះអាងថា តម្លៃទំនិញគ្រប់មុខនៅកម្ពុជា បានកើនឡើងពីមួយខែទៅមួយខែ ហើយមកដល់ឆ្នាំ២០១១ នេះ តម្លៃម្ហូបអាហារបានកើនឡើងជាគំហុកលើសឆ្នាំណាទាំងអស់។
២២-មីនា-២០១១៖ កន្លែងលក់សាច់នៅផ្សារច្បារអំពៅ រាជធានីភ្នំពេញ
លោកបណ្ឌិត ហេង គឹមឡុង មានប្រសាសន៍ដូច្នេះ នៅគ្រាដែលតម្លៃម្ហូបអាហារនៅកម្ពុជា ត្រូវបានធនាគារពិភពលោកអះអាងថា មានការកើនតម្លៃជារៀងរាល់ខែនៅក្នុងឆ្នាំ២០១១នេះ។
លោកបានសម្ដែងការបារម្ភចំពោះកម្មករ អ្នកស្រែចម្ការ និងអ្នកដែលរកប្រាក់ចំណូលបានតិចតួចដូច្នេះ ៖ «បើ សិនជាការដែលយើងបារម្ភនោះ គឺយើងបារម្ភនៅក្នុងរយៈពេលឆ្នាំទៅខាងមុខទៀតទេ។ ឆ្នាំនេះយើងដឹងថា ជាការគំរាមកំហែង ហើយវាប៉ះពាល់ទៅដល់ការបញ្ជាទិញរបស់គាត់ គឺពលករដែលមិនសូវមានជំនួញខ្ពស់នោះ ជាការព្រួយបារម្ភនៅក្នុងឆ្នាំនេះ។ ខ្ញុំគិតថា បើសិនជាវាចេះតែឡើងអ៊ីចឹងទៀត ហើយសមាមាត្រនៃប្រាក់បៀវត្សរ៍ដែលឡើង ឬក៏ប្រភពចំណូលដែលឡើងទាបជាងតម្លៃទំនិញឡើងអ៊ីចឹង ខ្ញុំគិតថា ក្នុងរយៈពេល ២ឆ្នាំទៀតវាអាចផ្ដល់ផលអាក្រក់កាន់តែធ្ងន់ជាងហ្នឹង»។
មកដល់ពេលនេះ នៅលើទីផ្សារ តម្លៃសាច់ជ្រូកមួយគីឡូក្រាមថ្លៃ ២២.០០០រៀល ហើយសាច់គោមួយគីឡូក្រាមថ្លៃ ២៧.០០០រៀល និងត្រីមួយគីឡូក្រាមថ្លៃជិត ២០.០០០រៀលហើយ។
របាយការណ៍ប្រចាំខែឧសភា របស់ធនាគារពិភពលោកនៃព្រឹត្តិបត្រឈ្មោះ "តម្លៃទំនិញ និងប្រាក់ឈ្នួល" បានបង្ហាញថា ទំនិញប្រើប្រាស់ចំនួន ២៥៩មុខ បានកើនតម្លៃគ្រប់មុខពីមួយខែទៅមួយខែ ចំនួន ១,១% គឺស្មើនឹង ៥,២% ក្នុងមួយឆ្នាំៗ គិតមកដល់ខែមេសា។
សម្រាប់ឆ្នាំ២០១១នេះ តម្លៃម្ហូបអាហារបានកើនឡើងចំនួន ៥,៧% ក្នុងមួយឆ្នាំៗ គឺមានតម្លៃខ្ពស់ជាងពេលណាៗទាំងអស់ បើប្រៀបធៀបទៅនឹងការឡើងថ្លៃម្ហូបអាហារចាប់តាំងពីឆ្នាំ២០០៧មក។
នេះគឺជាការកើនឡើងបន្ថែម បន្ទាប់ពីរយៈពេលពេញមួយឆ្នាំនៃឆ្នាំ២០១០ តម្លៃទំនិញមានស្ថិរភាពនៅនឹងមិនឡើងមិនចុះ។
ទោះបីជាអ្នកស្រែបានត្អូញថា ផលិតផលស្រូវដែលលក់ឲ្យឈ្មួញបានតម្លៃថោកមិនរួចថ្លៃផលិត ប៉ុន្តែរបាយការណ៍របស់ធនាគារពិភពលោកបាននិយាយថា ឆ្នាំ២០១១ តម្លៃអង្ករបានកើនឡើងខ្ពស់ជាងឆ្នាំមុនៗ គឺអង្ករគុណភាពអន់បំផុត មួយគីឡូក្រាមមានតម្លៃជិត ១.៨០០រៀល។ គិតជាមធ្យម តម្លៃអង្ករបានកើនតម្លៃប្រហែល ២,៨% ក្នុងមួយខែ ហើយស្មើនឹង ១៦,៨% ក្នុងមួយឆ្នាំ។
របាយការណ៍ដដែលបានឲ្យដឹងទៀតថា តម្លៃម្ហូបអាហារវិញ បានកើនឡើងកាន់តែអាក្រក់ទៅទៀត។ តម្លៃប្រេងឆា គិតមកដល់ខែមេសា ឆ្នាំ២០១១ បានឡើងជិត ៣៨% បើប្រៀបធៀបរយៈពេលដូចគ្នានៅឆ្នាំ២០១០។ ប៉ុន្តែបើគិតពីតម្លៃប្រាក់ឈ្នួលរបស់កម្មករគ្មានជំនាញវិញ ក្នុងមួយថ្ងៃគេអាចរកបានចន្លោះ ១ម៉ឺនរៀល ទៅ ១២.០០០រៀលប៉ុណ្ណោះ គឺមានន័យថា កំណើនប្រាក់ខែរបស់កម្មករស៊ីឈ្នួលបានកើនចំនួន ០,៨% ពីមួយខែទៅមួយខែ គឺស្មើនឹង ៣,៧% នៃកំណើនប្រចាំឆ្នាំប៉ុណ្ណោះ។
នៅតាមដងផ្លូវសាធារណៈ ក្រុមអ្នករត់ម៉ូតូឌុប និងក្រុមអ្នករត់រ៉ឺម៉ក ក៏ដូចជាក្រុមអ្នកផ្សារ កម្មករកាត់ដេរ និងកម្មករផ្នែកផ្សេងទៀត បានត្អូញអំពីរឿងនេះ។
អ្នករត់រ៉ឺម៉កឈ្មោះ អេង សុភ័ណ អាយុ ៤៥ឆ្នាំ នៅសង្កាត់និរោធ ក្រុងភ្នំពេញ បានបញ្ជាក់បន្ថែម ៖ «ពិបាកបន្តិចបង! ពិបាករក ហើយកាលណាដែលយើងរកមិនបាន គឺថា ជីវភាពប្រចាំថ្ងៃរបស់យើងថយតាមហ្នឹង។ ការចំណាយយើងវាច្រើនពេក។ ទីមួយកូនរៀន ថ្លៃទឹកថ្លៃភ្លើង។ កូនរៀនគិតថា ៣ពាន់ក្នុងមួយថ្ងៃ អត់ទាន់បានគិតថ្លៃម្ហូបជុំគ្នាផង»។
ដូចគ្នានេះដែរ លោក ជា មុនី ប្រធានសហជីពសេរីកម្មករ អត្ថាធិប្បាយថា ស្ថានភាពកម្មករកាត់ដេរវិញ រឹតតែយ៉ាប់ទៅទៀត ៖ «យើង សង្កេតឃើញថា កម្មករទាំង ៣៧ម៉ឺននាក់កំពុងតែជួបបញ្ហាធ្ងន់ធ្ងរ។ ឥឡូវនេះយើងឃើញថា កម្មករមួយចំនួនកំពុងតែមានសុខភាពទ្រុឌទ្រោមនៅពេលដែលគាត់ញ៉ាំ អាហារស្ដួចស្ដើង។ ពីដើមគាត់ញ៉ាំមួយពេលអស់ ១.៨០០រៀល ប៉ុន្តែគាត់អាចញ៉ាំបាន ទោះបីជាអាហារនេះមិនឆ្ងាញ់ក៏ដោយ តែអាចមានកម្លាំង»។
អ្នកជំនាញផ្នែកសេដ្ឋកិច្ចលោក ហេង គឹមឡុង បញ្ជាក់ថា ការឡើងថ្លៃស្បៀង និងម្ហូបអាហារកើតឡើងដោយសារតែការផ្គត់ផ្គង់ត្រី សាច់សត្វ និងរបស់កសិផលមានការខ្សត់ខ្សោយមិនគ្រប់តម្រូវការទីផ្សារ ហើយបញ្ហានេះបានរីករាលដាលពាសពេញពិភពលោក ប៉ុន្តែការប៉ះពាល់ធ្ងន់ធ្ងរសម្រាប់កម្ពុជា កើតឡើងដោយសារតែប្រាក់ចំណូលរបស់ពលរដ្ឋខ្មែរទាបពេក។
តំណាងរាស្ត្រគណបក្ស សម រង្ស៊ី លោក សុន ឆ័យ មានប្រសាសន៍ថា ដល់ពេលវេលាដែលត្រូវមានច្បាប់សម្រាប់កំណត់ប្រាក់បៀវត្សរ៍អប្បបរមា សម្រាប់មន្ត្រីរាជការ និងនិយោជិកទាំងអស់នៅក្នុងប្រទេសកម្ពុជា ហើយ ក្រោយពីការទាមទារអំពីរឿងនេះរបស់តំណាងរាស្ត្រគណបក្សប្រឆាំងទាំង អស់ត្រូវបានគេរាំងខ្ទប់មក។
លោក សុន ឆ័យ ពន្យល់ថា នេះជាច្រកមួយដើម្បីជួយដល់អ្នកមានប្រាក់ចំណូលទាបទាំងអស់ ៖ «យ៉ាង ហោចណាស់យើងគិតគូរពីកម្មករ ពីមន្ត្រីរាជការ ពីកងកម្លាំងប្រដាប់អាវុធរបស់យើងដែលរដ្ឋអាចធ្វើទៅបាន ដើម្បីឲ្យពួកគាត់មានស្ថានភាពបែបនេះ ដែលទំនិញឡើងថ្លៃគ្រប់បែបយ៉ាងដោយធ្វើជាច្បាប់កំណត់»។
កម្មករ គ្រូបង្រៀន ក្រុមអ្នករត់ម៉ូតូឌុប ធ្លាប់បានស្នើសុំឲ្យមានការដោះស្រាយ ប៉ុន្តែមកដល់ពេលនេះ មិនទាន់ការឆ្លើយតបពីមន្ត្រីរដ្ឋាភិបាលនៅឡើយទេ។
មន្ត្រីជាច្រើននាក់នៃក្រសួងសេដ្ឋកិច្ច និងហិរញ្ញវត្ថុ ដែលវិទ្យុអាស៊ីសេរី បានទាក់ទងសុំសេចក្ដីបំភ្លឺ មិនធ្វើអត្ថាធិប្បាយឡើយ នៅថ្ងៃព្រហស្បតិ៍ ទី៩ មិថុនា។
ជុំវិញរឿងនេះ អ្នកជំនាញផ្នែកសេដ្ឋកិច្ច និងអ្នកតំណាងរាស្ត្របានផ្ដល់យោបល់ថា ថ្វីបើគេមិនអាចបញ្ចុះតម្លៃទំនិញបានទេ ប៉ុន្តែរដ្ឋាភិបាលគួរតែចាត់វិធានការបន្ទាន់ទៅលើការបង្កើនការ បណ្ដុះបណ្ដាលសមត្ថភាពរបស់ប្រជាពលរដ្ឋ ក្នុងការរកការងារធ្វើ ដើម្បីឲ្យបានកម្រៃខ្ពស់ និងរៀបចំប្រព័ន្ធស្រោចស្រពឲ្យបានគ្រប់កន្លែង ដើម្បីឲ្យអ្នកស្រែចម្ការមានលទ្ធភាពធ្វើកសិកម្មជាប្រចាំ ក្នុងការបង្កើនប្រាក់ចំណូល ក៏ដូចជាបង្កើនផលិតផលកសិកម្មនៅលើទីផ្សារ៕
ไม่มีความคิดเห็น:
แสดงความคิดเห็น