ថ្ងៃព្រហស្បត្ត៏ ទី៧ ខែកក្កដា ឆ្នាំ២០១១ ម៉ោង ១៧:៤៤
កោះសន្តិភាព
ស្រ្តីជាម្តាយដែលចាញ់ក្តី
រាជធានីភ្នំពេញ ៖ លោកហ៊ឹង ប៊ុនជា
ព្រះរាជអាជ្ញារងតំណាងឱ្យស្ថាប័នអយ្យការសាលាដំបូងរាជធានី
ភ្នំពេញ កាលពីព្រឹកថ្ងៃទី៧ កក្កដា
បានដឹកនាំកម្លាំងចម្រុះចុះអនុវត្តសាលដីកាតុលាការកំពូល
នៅផ្ទះលេខ១៣៣Eo ផ្លូវលេខ២៧៤ សង្កាត់បឹងព្រលឹត ខណ្ឌ៧មករា
ដែលសាលដីកានេះបានសម្រេចឱ្យប្រគល់ផ្ទះលេខ១៣៣Eo ទៅឈ្មោះទឹម
សុភាព ភេទស្រី អាយុ៥៣ឆ្នាំ និងតម្រូវឱ្យឈ្មោះហែម គង់ ភេទស្រី
អាយុ៧៥ឆ្នាំ ត្រូវជាម្តាយ ស្នាក់នៅបន្ទប់តូចមួយខាងក្រោយ
និងពុំអនុញ្ញាតឱ្យឈ្មោះទឹម សុខថូ, ឈ្មោះកែវ យុន, ឈ្មោះទឹម
សុធា និងឈ្មោះទឹម រម្យនា រស់នៅលើផ្ទះនោះទៀតឡើយ។
ក្នុងកំណត់ហេតុរបស់គណៈកម្មការចុះអនុវត្ត
សាលដីកានោះបានបញ្ជាក់យ៉ាងច្បាស់ថា
ពិនិត្យជាក់ស្តែងលើឈ្មោះហែម គង់ ត្រូវជាម្តាយអ្នកស្រីទឹម
សុភាព
ដែលជាអ្នកឈ្នះក្តីគឺសាលដីកាតម្រូវឱ្យលោកយាយនៅចំណែកខាងក្រោយ
ខាងកើតផ្ទះមានបន្ទប់តូចមួយ
និងមានទ្វារមួយជាច្រកចេញតាមឌឿងហែមខាងក្រោយ
មិនឱ្យឆ្លងកាត់មុខផ្ទះអ្នកស្រីទឹម សុភាព នោះទេ។
ចំណែកសំយាបមួយទៀតដែលលោកយាយ និងកូនតភ្ជាប់ពីផ្ទះលេខ១៣៣Eo
សម្រាប់ដាក់លក់អាគុយគឺរក្សាទុកជាធម្មតា។
ដើមចមដែលបានធ្វើឱ្យមានការចេញសាលដីកា
របស់តុលាការកំពូលនោះត្រូវបានមន្ត្រីអនុវត្តសាលដីការៀបរាប់ឱ្យ
ដឹងថា យាយជាម្តាយឈ្មោះហែម គង់ និងកូនស្រីឈ្មោះទឹម សុភាព
បានក្តីក្តាំប្តឹងប្តល់គ្នាដណ្តើមយកផ្ទះលេខ១៣៣Eo
នេះតាំងពីឆ្នាំ២០០៧មកម៉្លេះ។
លោកយាយហែម គង់ ជាម្តាយនិយាយថា
គាត់បានចូលមកបោសសំរាមនៅផ្ទះនេះតាំងពីឆ្នាំ១៩៧៩
ពោលគឺបែកពីរបបប្រល័យពូជសាសន៍ប៉ុល ពត ហើយកូនស្រីគាត់ឈ្មោះទឹម
សុភាព
នេះលោកយាយទើបតែហៅមកនៅជាមួយក្នុងអំឡុងឆ្នាំ១៩៨០មកទេ។
ការរស់នៅម្តាយ និងកូន
ក្រោយមកអ្នកស្រីទឹម សុភាព
បានធ្វើប្លង់កម្មសិទ្ធិកាន់កាប់ផ្ទះគឺ
បានដាក់ឈ្មោះអ្នកស្រី អត់មានឈ្មោះគាត់ជាម្តាយទេ។
ដូច្នេះហើយបានជានៅឆ្នាំ២០០៧
លោកយាយដាក់ពាក្យប្តឹងទៅសាលាដំបូងរាជធានីទាមទារយកផ្ទះ
គាត់វិញ ពោលគឺម្តាយប្តឹងកូនជាលើកដំបូង ។
រឿងក្តីនេះបានតតាំងគ្នារវាងម្តាយ
និងកូនបង្កើត ពីសាលាដំបូងរហូតដល់សាលាឧទ្ធរណ៍
និងចុងក្រោយនេះតុលាការកំពូល បានសម្រេចឱ្យអ្នកស្រីទឹម
សុភាពជាកូនឈ្នះក្តី និងកាន់កាប់ផ្ទះលេខ១៣៣Eo នោះតែម្នាក់ឯង ។
ដោយឡែកលោកយាយហែម គង់
ជាម្តាយពេលចាញ់ក្តីដណ្តើមផ្ទះកូនតាមផ្លូវតុលាការមិនបាន
ត្រូវបានសាលដីកាសម្រេចឱ្យជ្រកក្នុងបន្ទប់តូចមួយខាងក្រោយ
ផ្ទះកូនដែលឈ្នះក្តី ដែលការរស់នៅហាក់ដូចជាពុំមានសេរីភាព
និងយ៉ាងតប់ប្រមល់។ ពិសេសទៅទៀត ម្តាយ
និងកូនដែលបានក្តីក្តាំគ្នានោះមិនបាននិយាយស្តីរកគ្នាទេ
វាហាក់ដូចលែងជាម្តាយ លែងកូនទៅហើយ។
អ្នករស់នៅជិតខាងបានពោលថា អ្នកស្រីទឹម
សុភាព អតីតជាគ្រូបង្រៀន មានការចេះដឹងដែរ
និងជាស្ត្រីមេម៉ាយគ្មានកូនចៅ
មិនគួរបោះបង់ម្តាយចោលយ៉ាងដូច្នេះទេ ។ ចុងក្រោយ
លោកយាយហែម គង់ ជាម្តាយដែលមានអាយុ៧៥ឆ្នាំ
ពោលទាំងចិត្តក្តុកក្តួលថា លោកយាយមិនអាចធ្វើអ្វីបានទៀតទេ
នេះជាព្រហ្មលិខិតបានកំណត់ឱ្យលោកយាយ
និងកូនចែកផ្លូវគ្នាដើរហើយ។ លោកយាយនិយាយថា
តុលាការចុងក្រោយសម្រេចឱ្យលោកយាយរស់នៅក្រៅផ្ទះ
ហើយផ្តល់សិទ្ធិឱ្យកូនគ្រប់គ្រងបែបនេះ
រូបគាត់គ្មានផ្លូវជំទាស់ទៀតទេ។
មិនអាចសុំការធ្វើអត្ថាធិប្បាយពីអ្នកស្រីទឹម សុភាព
ជាកូនដែលឈ្នះក្តីនេះបានឡើយ ៕
ไม่มีความคิดเห็น:
แสดงความคิดเห็น